الا يا ونة فيني خفية
حزينة جارحة بي سرمدية
قوية جامحة في جوف روحي
تبي تظهر وانا اضلاعي عصية
اذا حل الدجى واكتف نوره
نيارين الحشا يزداد ضية
واذا حل الصباح اخفيت مابي
تظاهرت ان انا حالي قوية
وانا والعالم الرحمن فيني
فريسة تنهش الاحزان فيه
فريسة ماضيٍٍ ما غاب عني
ولا غابت لياليه الهنية
ولا غابت ملامح من تخلد
بقلبٍ هالكٍ وروحٍٍ شقية
حبيبٍ فيه اجمل ما توصف
جمعني فيه خلاق البرية
جمعني فيه رب العرش ربي
بلا موعد تلا قينا سوية
بلا موعد لقيت اللي احبه
بلا موعد خذا قلبي هدية
نظرته ونظرتني وإكتفينا
بنظرة صادقة ماهي ردية
حلفت إني ابد ما حيد عنه
وهي ما ترتضي دوني شفية
بديت احسد دنو الاهل منها
صغيرٍ بنظرةٍ وإخته وخيه
بدت تصعب مواقفنا ولكن
رضينا بالامل حالٍٍ شقية
وبدت قدامنا الابواب توصد
وبقينا ننتظر نبذه ضوية
ولكن للاسف بوب الرجاوي
قفلها الياس وأمحاها خفية
جبرها الوقت مع ظلم الليالي
تجيني حايره دموعه همية
تجيني ترجف شفافه بعبرة
كما عبرة طريح ٍ للمنية
وقالت يا وداع الله تصبّر
وقلت العلم قالت لي عطية
عطية صرت انا لغيرك ونا اللي
اشوف النفس عن غيرك ابية
وكم حاولت يالغالي ولكن
ثمر كل ما صنعته لي اذية
عطتني كفها وأدنت نضرها
على قاع الثرى كنه سبية
وجرّت حسرةٍ وإهتز عوده
وصاحت شوف فعل الوقت فيّة
شعور ٍ صابني بالقرب منه
عسير ٍ اوجد أوصافه وزيه
شعور اللي يسل السم روحه
بأرض ٍ مبعدة جردا خلية
شعور اللي يفج السيف قلبه
وهو متقيد كفوفه خلية
شعور اللي يشوف اعزاز عمره
جرفهم سيل برياح ٍ عتيه
شعور ٍ كيف أوصف كيف اعبر
ألا يا حيرة التعبير فيه
ندهته يالحبيبة لا تنوحي
وتزيديني على البلوه بلية
انا ادري مرغمه وادري جريحه
واعرف انك بكل صدقٍ ٍ وفيه
وأعرف الزفاف اللي يحضر
كما نعشٍ ٍ يحضر للوفية
ولكن كان وقتك جار فينا
انا من دونكم نفسي جزية
صيام النفس عن كل العذارى
صيامٍ ٍ ما تحلله المسية
صيامٍ ٍ يا حياتي دون عيدي
صيام يدوم لجل الشمرية
صيام يدوم لجل اللي وفاها
من اصله نابعٍ ٍ ما هو هدية
صيام يدوم لجل اللي حلاها
عسيرٍ ٍ ينوجد بين البرية
صيام يدوم لجل اللي طباعه
عفيفت نفس عذبه بالسجية
صيام ٍٍ دايم ٍ قلته وأنا اللي
سلايل من يسود الهاشميه