الجرح ماهو خاطر شوي ويروق
الجرح حتى لو تشافى يعللــك
واذاك متحمس متاهات وطروق
أنا تعبت أشد حيلي وأحاولك
سماي ماشي شمس ورعود وبروق
والريح ماهبت ولايجري الفلك
والقلب ناشف بحر 00وشقوقه شقوق
وشلون بيكود سحاب ويبللك
ياظامي أنا أظما 00ومتشبع حروق
واذاك ظامي للمواصل أنا هلك
هلك00ووقف في وجهي الأصل والذوق
والمجتمع، والعرف،والفقر،واهلك!
متعومس00وحزن النبلاء مرموق
يعني لو احتاج لك ماجيت اسألك
اللي علي اشكي 00واعاتبك برفوق
واقول لك ودي ماعاد اتأملك
من دورة الأيام ياخوك مخنوق
الوقت مشّاني من السلك للسلك
أزل خطوه بس ماأزل منطوق
ولو صارت أبا احب خشمك وأجاملك
يبقى البني آدم مجرد ومخلوق
ملك00ولكن في الحقيقه بلا ملك
والناس عوق الناس00والدرب مسبوق
تتعب على أشيا00فـ الآخر ماهي بإلك
كذّاب قايل كل مطرود ملحوق
سنين وانا أطردك وازريت لا أوصلك
كنك تطيش وكني أدور في طوق
كل ماوصلت آخرك يطلع لي أولّك
ياليت مافي خاطري شوق وفروق
ماكان حسيت أن أنا بس منك إلك
الشوق ماهو رعشه وقبضة عروق
وماهو اللي من شينك فـ عينك يجملك
وماهو شعور يخالج الروح برفوق
ولاهو سحر ولاأدري والله شاقول إلك
كنه سحابة حلم وتطير بك فوق
وتطيــــــــــر 00ولاودك انها تنزّلك
الشوق هذا 00والاأنا شوقي البوق
ماقد حصل في شوق هذي ولا تلك
تدري وش أسوي الى أضناني الشوق
أسوي بـ عيوني كذ ا000وأتخيلك
وأقربك واتوق00واتوق00واتوق
وتطيح مع دمعي على ايدي واقبلك
هذا غلاي اللي مع الدم مدقوق
ولاعاد تسأل عن شعوري،،بزعلك
محبة ماهيب من طارف السوق
لو أنك توكل00كان والله لااكلك
جيتك حقوق ورحت ماعندي حقوق
وان قلت ماأحبك أبجحد مواصلك
أحبك؟ الا يابري حالي وعوق
من كثر ماأحبك أخاف أني أقتلك