لا تعتذر ... لا تقسم بخالق البيت=ماعاد يعنيني كلام تضيفه
وش عاد... لو أنك من الشوق رديت=بالعكس أنا أشواقي تراها ضعيفه
ياجاحد إحساسي ترى ماتناسيت=جرح الفؤاد اللي تزايد نزيفه
رح لعنبو قلبٍ تمناك لقفيت=رح لعنبو قلب يحطك وليفه
ياليتني في حق حبك ترديت=ليت القدر بيني وبينك نصيفه
ياليتني خنتك ولاأخلصت ووفيت=وأصبحت في دنيا الغدر لك وصيفه
استغفر الله للغدر لو تمنيت=يرفعني أصلي عن دروبٍ سخيفه
في صادق إحساس بحبك تعاليت=نفسي عن الزله وروحي عفيفه
الله حسيبك مذكر بحقك أخطيت=صفحة حياتي في غرامك نظيفه