يعقد لساني بعض الاحيان خفقه
معها تزف العين دمعي سكايب
الروح مشتاقه .. على الخل شفقه
يتوب خلق الله و لاني بتايب
الحب ضخ الشوق دفقه و دفقه
فيها عروق القلب تجري سرايب
قلبي يحبك حيل .. ما هو بلفقه
مثل الذي ودع و شد الركايب
يالناعم الرويان ودي بصفقه
اعطيك قلبي و انت سيد الحبايب
ما هو بلاش(ن) يابعد كل رفقه
ابي وعد منك و فيها طلايب
الاوله خل البشر دوم تفقه
ان الذي بين المعاليق ذايب
والثانيه مابي دوادي و طفقه
انا شبابي بالموازين شايب
يا سيدي تعرف من الباب صفقه
هل هو جديدٍ او طمته الترايب
كانك تبي يامرحبا خير وفقه
و ان ما تبي قلبي قفلت الحدايب