يامسهر عين عاشق في غرامك
لك من اعماقي سلام ولك تحيه
والك قلبي وانت عارف وش مقامك
غير عن كل الاوادم والبريه
انته اللي من زمن ناصب خيامك
فوق صدري بالغصب وبطيب نيه
تامر وتنهى وانا هاوي نظامك
كني اللي تو خش العسكريه
كل ماناديت بسمي جيت امامك
اترك الدنيا وراي وماعليه
سم يالبيه واسهى مع كلامك
وابتسم كني ملكت الفيصليه
من كثر مااهواك صرت احسد عظامك
كيف تشتالك عظامك عن يديه
ومن كثر مااعشقك قاهرني منامك
كيف يهنابك وانا عيني شقيه
انت ماتدري وش مسوي هيامك
في خفوق اللي نسى ربعه وحيه
صار مايهرج ولن قالوا علامك
قال ضيعت الحروف الابجديه
كل ماخيم على عيني ظلامك
جيت لك ساري وانا جروحي خفيه
داوني ياغاية الملهوف دامك
تملك اقوى من علاج الصيدليه
شوفتك طب الجريح اللي سهامك
تذبحه لاغبت عن عينه شويه
ضمني بين الرضا واقسى خصامك
ولاتفارقني ترى بعدك خطيه
واخذني حب وتقلدني وسامك
ونسهم قيس وغرام العامريه