مع مغيب الشمس ليـلي اسأله
ومع شـروق الـشمـس يسألـني نـهار !!!
ماعرفته ؟؟ قلت ليلي يجـهله
وانت مثـله !! يا خساره واستدار !!!
واستمر الحال ليله مقبله
مع نهارن مدبرن لاذ بفرار !!!
والسؤال بخاطري ما اتحمله
في خفوقي يتقد يقدح شرار !!!
يوم قالت لي " حرامن " قلت له
في سكوتن لا تزيد النار نار !!!
يكفي اني ميـتن شوق و وله
ودي اعرف من ورا ذاك الستار !!!
صارحيني دام حنا بأوله
مستحيل انـتي وانا نلعب قمار !!!
ليل صـمتك مـع سؤالي مااطـوله
والليالي لانجلى صمتك قصار !!!
التساؤل صار عدة اسئله
والاجابه !! في جحيم الانتظار !!!
انتظر ثم انتظر ثم امهله
وانتظر ثم انتظر مالي خيار !!!
والجديد من القصايد ابخـله
ما تغلى وانتي ادرى بـاخـتصار !!!
النحل لولا الزهـر وين عسله
والـزهر لولا النحل وين الثمار!!!
القصيده في ضلوعي مكبله
تستغـيثك وبيدك فـك الحـصار !!!
تنتظر نزع القـيود مـؤجله
خايفه من قولتك فات الـقطار !!!
والله اني لا بغـيت اتخيله
الخيال ببحرها منها يغار !!!
حالفن بالله لاجلـك لاجعلـه
درتن داخـل محاره في بحار !!!
القصيده لا بغـيت اسـتعجله
شاعري من سحـرها استـغفر و صار!!!
قبلهـالازم يقول البسمله
لا يصيـبك بالحسد ناسن كثار !!!
يكفي ان " اعجابك " احيا هيكله
انبعث من بـرزخه يـنفض غبار !!!
شاعري والله لـو مـا اتـوسله
ينتظر منك الاشاره !! كان ثـار !!!
قالها والكل صابـه زلزله
السهـارى شهرزاد و شهريار !!!
السفر حل السفر !! قلت اشعله
ليل حزني بالقصايد و استخـار!!!
شاعري من خوف حزني يقتله
قال عفوا ما اريد الانتحار !!!
" الزمان 2 مارس " سجلـه
المكان بشاطيء الدوحه و دار!!!
الحوار اللي كتبته ما اجمله
واسمحوا لي ما معي " نص الحوار !!!
والسؤال اللي سقاني الحنظله
الاجـابه تحمـل اسمن مستعار !!!