تعال وأعتقني من الصمت مليـت
تعال وأطلق عقـدةٍ مـن لسانـي
تعال قلّي بس أنا ويـش سوّيـت
يوم أكثر العالـم تحـرّى جنانـي
تعال علّمنـي وأعلمـك لا جيـت
عن غربـةٍ هـدّت زوايـا كيانـي
وأعلّمك وشلون فـرق التواقيـت
يقدر ينسّي من ذكـرت ونسانـي
كـن بعيونـي للحبايـب توابيـت
أستـر بقايـا المبعديـن بحنانـي
أعطي قلوب الناس ماكني أعطيت
وأمد كـف الوصـل كـلٍ جفانـي
تدري أنا ..يمكن تساهلت وأخطيت
ويمكن بغيت أستسمح ومامدانـي
بس الأكيد أني من الحـزن مليّـت
وأكيد ملّ الحزن من هـو قرانـي
ومتأكد أكثر بأنك أن كان ماجيـت
بأعذرك.. لأن.. المشكله في زماني