ضايعٍ من كان همه فـي حياتـه
كيف يشبع رغبته بأيـة وسيلـه
ما تهمه ليـه والا كيـف جاتـه
مـا تهمـه مخطيـه والا دليلـه
المهم يعيـش لحظـه لشهواتـه
لو من الحسنات ما عنده حصيله
في طريق الشر ياسرع انفلاتـه
وان عرض له خير ما ياخذ سبيله
ما يريد الخير في كـل حركاتـه
ما مشت رجله على درب الفضيله
عايش بدنياه مـا همـه مماتـه
ما درى وش تالية عمره يجيلـه
غرته دنيـاه مـع كثـر امنياتـه
يحسب انه بالهنى راعي طويلـه
راح عمره ما بقـى الا ذكرياتـه
لا تذكر ما ذكـر غيـر الفشيلـه
ما ذكر ربـه ولا صلـى صلاتـه
ضيع اوقاته علـى درب الرذيلـه
حافـظٍ مالـه ولا يدفـع زكاتـه
ما درى انه يحفظه للـي يشيلـه
ما حفـظ دينـه ولا دور نجاتـه
مثل هذا بالسعـد وش ترتجيلـه
ضايعٍ خسران من هذي سواتـه
كان مالله ساعده ما فيـه حيلـه
رابحٍ من كان همـه فـي حياتـه
كيف يرضي خالقه بايـة وسيلـه