كيف؟ تنساني وانا اصلاً لو نسيت
انسى خلق الله عشانك واذكـرك
كيف؟ تجفاني وانا مهمـا جفيـت
مستحيل انسى وصالك واهجـرك
من لمحتك في عيوني ماختفيـت
دايـم وعينـي تشاهـد منظـرك
انت تدري ؟ وإلا توّك مادريـت؟
مستعد اخسر كيانـي مخسـرك
والله إنك لو على قلبـي خطيـت
كثـر ماتخطـي ترانـي بعـذرك
لكن ارجع لـي ترانـي انتهيـت
مقدر اقضي كل عمـري انطـرك
صرت احبك حتى لو عيبك قسيت
من كبيرك صرت احبك لصغـرك
كم على شانك تعذبـت وشكيـت
رغم هـذا مانـي قـادر انكـرك
والله إنـي ماتوقعـت وهقـيـت
اقدر العالم ! وعاجـز لا قـدرك
اشعر انك معي ماعمرك وفيـت
بس اكذب واقعـي واستشعـرك
ليه تبخل ؟ ياحبيبـي ماعطيـت
وإلا هو تأكيـد حبـي غيّـرك ؟
ليه تهـدم ؟ ياحبيبـي مابنيـت
يعني قلي ليمتـى وانـا اعمـرك
كلي اشقى وانت بالدنيـا لهيـت
تسمر وتلهى وانـا دوم اسهـرك
انقهر وآغيض واسكت ماحكيـت
حالتـي حالـه وعيـت تقهـرك
في شعورك كنك البحر المميـت
والمحبـه تجبـر انـي اعبـرك
حس فيني دامنـي فيـك ابتليـت
والبـلا حلـه تـرى مايعسـرك
القصايد عنك تكتـب بيـت بيـت
اكتب احساسي وثرني اشهـرك !
لولا ان الحـب الاكبـر للكويـت
المطيـري جايـز انـه يأسـرك
بإختصار ! ان كنت تنهي مابديت !
لك عليّ اني على طول اهجـرك
والصحيح ان كنت ترجع لي ياليت
وقتها من كـل قلبـي بشكـرك