الليـل شكلـه يجـذب الهـم ويخيـف
وفـيـه الثـوانـي والدقـايـق ثقيـلـه
حـل الظـلام وقربـت حـزة الضـيـف
ضيـف يشـارك وحدتـي كــل ليـلـه
ياضيف قبل اتزورني قول لي كيف
الـقـى لصـداتـك وفـرقــاك حـيـلـه
ياضيـف جيـاتـك عــذاب وعجـاريـف
وابغى اتخلص منك بائيـت وسيلـه
ياضيف منك ادموع عينـي ذواريـف
وعسفتني عسف المهـار الاصيلـه
وشليت قلبي شلـت النـود للريـف
وشبيتـنـي شــب الـزنـاد الفتـيـلـه
لاجيت تفتح لـي ملفـات الارشيـف
وتكشف لي اجروح الزمان العليلـه
عذبتني وانا ادمي قلبـي اصخيـف
وشليت حملـك والجمـل مايشيلـه
ياضيـف بشرنـي عساهـا تخافيـف
ياخوفتـي لـو انـك راعــي طويـلـه
من ميلة الدنيا ومن سطوة الضيف
انــــا جــويــر الله وانـــــا دخـيــلــه