ياغاليه لـولا غـلاك ابخفوقـي
ماسقت لك ذود القصايـد هدايـا
حبك تملكني مشى فـي عروقـي
حتى أسرني من أمـام و ورايـا
في ضمتك أعصاب خلك تروقـي
ويذوب من طعم العسل بالشفايـا
عندي طلب اشوفه أبسط احقوقي
ياربـة الحسـن البديـع ومنايـا
أغفي على صدرك ولا أبغى أفوقي
وأنسى الألم وأذكرك وأنسى شقايا
يافاتنه يانور شمـس الشروقـي
يافارعـه ياطـب قلبـي ودوايـا
إنتي سحابه لاح فيهـا ابروقـي
وأنا العطش فيني كثيـر الزرايـا
صبي غرامك لين تروين شوقـي
ترى الدوى فالحب صدق النوايـا
أعزفك انا بإحساس شعري وذوقي
وأغني إسمـك بالعلـن والخفايـا
مجنون ليلى لو يشوفـك يبوقـي
يخون ليلى مـن عظيـم الحلايـا
لك نظرة ٍ منها تغـص الحلوقـي
إنتـي خلقتـي للجميـلات آيــآ
أنا الفهد لأجلك جزوع وشفوقـي
من بعد حبك عاف كـل الصبايـا
عن كل حواء زايـده بالفروقـي
يغار منك العطـر ويًـا المرايـآ