اهداء / احاسيسي
العيون اللي عن الراحة عزوف
وآعناها من عذابك يا السهد
يا السهاد اللي عليها ما تروف
شف شقاها لا مناص ولا سند
قد غشاها من صدوف الوقت خوف
كـّـل ما أرمش هدبها ترتعد
تحتضر والوقت يبطي ما يطوف
تنتظر عله يجي وقت الوعد
والوعد حظه تعانده الظروف
وّل ! يا حظٍ علامك في هجد
آهـ يا عينٍ على شوفه لهوف
ما لقت راحه ولا فيها جلد
لو تراعي في نظرها ما تشوف
غير زول اللي تمكن واستبد
الحبيب اللي بتعذيبي سروف
يملك بتعذيب محبوبه عتد
من بهى حسنه و من زين الوصوف
من حسن ذاك المحيا والجسد
ومن حلى صوته و همسات الحروف
ما حلى أسمي إذا نادت : سعد
إن وقف كل الحسن لأجله وقوف
وإن جلس من هيبته ذل و قعد
وإن صحى صاب القمر منه الكسوف
وإن غفى حتى القمر غار و رقد
وإن تنهد حل في صدري ضيوف
من هواها يبعث أنفاسٍ جدد
غيرت حالي و خلتني أعوف
غيرها ما أشوف ما أبصر أحد
ياالحبيبة والله إني لك شغوف
وجد قلبي في وصالك ما زهد
أنتظر وقت المصافح بالكفوف
حافظٍ كل الأماني في المهد
و يا عذابي ما تعودت النكوف
لو عذابك قد ضرب فيني وتد
بس لا تطغى على اللي بك عطوف
و ما بقى من قوته حيل و جهد
وش بعد باقي من الدنيا صدوف
غير ما ذاقه بعمره وش بعد
والعيون إن جّف ماها من الذروف
و ما بقى من دمعها أية مدد
لاحرموها من لقاها وش تشوف
كود قبري والجنازة واللحد
وقتها من دّم ، دمعاتي نزوف
و كـّل دمٍ في شراييني جمد !