يام را يوم تصافق جناح بجناح
والليل أقبل ع الخلايق سواده
البعض مثمل منتشي والبعض طاح
والبعض عايش في هنى وفي سعاده
وانا ضواني الليل بهموم واجراح
من زود مابي خاصمتني الوساده
لانوم يهنالي ولا زاد لي ساح
يام را قلبي كيف يبلغ مراده
لاني بسايح بين لقروب سوّاح
ولاني من اللي ياخذ السهر عاده
أسهر مع الذكرا على عود فوّاح
والبن أزيـّد في دلاله قناده
روحي تنادم بالذكر طاهر أرواح
يوم الهوى طاب وضمنت اعتماده
ياما سريت وذقت من صافي الراح
لبـّست ليل الانس ثوب وقلاده
ياويح قلبي وين وقت الهنى راح
وين الزمان الاولي مع وداده
يابوخميس الامس قفـّى بالافراح
ياللاسف راحت خزاين حصاده
ان مرّت الذكرا أسجـّع بالانواح
واخفي ونيني عن اصحاب الحقاده
أخاف يشمت بي حسود ٍ وفضـّاح
ويعرف سدودي سيدات ٍ وساده
الثوب من يقصر أخلّيه وارتاح
ماألبسه ولا أعتني في مزاده
ياما رفيت افتوق والسد ماباح
وعالجت جرح ٍ يستحق الاشاده
واليوم هاف الزرع والماي ضحضاح
ماعاد لي في محضر الشين راده
البدر ياه الغيم والفجر مالاح
والشمس غطـّاها السحاب بسواده
الطير غرّد من على غصنه وناح
ااااه يالفرح أعلن حداده
تصبحون على خير