لا سرا ليلي على جر اللحون الكايفه
زان لي نضم القوافي لحن وابيات وحروف
قمت احوف الفكر وارقابه شموخ النايفه
واقطف الجزله ولا انقى غير عذبات القطوف
الغلا والشوق مايسكن قلوبن زايفه
والاكيد انه بقلبي ماتزلزله الظروف
لجل عين المترفه ام العيون الخايفه
ناعسات الطرف ماتدري تشوف او ماتشوف
الغرام اللي غلاها في فوادي شايفه
مثل نور الشمس في صبحن نسانيسه عزوف
بكتب ابياتن تليق ابمستوى وصايفه
لو اعرف ان مستواها فايقن كل الوصوف
ان حكت تسلب فوادي من ورا طوايفه
كن رحيق الورد في حكيه مثل حد السيوف
عنفوان الجد في هيئة سحابه طايفه
لمطرت رد الحيا في خافقن جاته صروف
(آه) لبى غمزتينن جملت شفايفه
(وآه) لبى عينها ولبيه ياضحك الهنوف
الشعر على نحرها ليلن اسود حايفه
واعذابي لاتمايل فوق منبوز الردوف
ماسليت ابيوم عنه ولاني اللي عايفه
والليالي شاهده والقلب لعيونه شغوف
والغلا والشوق لو يسكن قلوبن زايفه
مابقا ذكر الملوح قيس مع ليلى امعروف