اما لطمنا العيل والا الطم العيل
*****************مادام شب النار مندوب الاطــــــفــــــا
من ذاق حر القايله يعشق الليل
*****************ومن شب ضوه ليلة البرد يــــــــدفــــا
امسيت في جيلٍ ولاهوب ذالجيل
*****************واصبحت والا ديرتي شبــــــه منـــفــا
واللي حما بيته بطيـرن ابابيـل
*****************ماجيت ادور كل من صد وقـــــفــــــــــا
ولاجيت ابشحذ يانما دلّه وهيل
*****************جيتك وجرح الظلم غـــــــاديه يشفــــا
جيتك بكلمه كنها صعقة الويل
*****************ان قلت تكفا لاتهـاون بتكــــــفــــــــــا
تكفا تراها كلمةٍ تقطم الحيـل
*****************لابالله الا تنسف الحيـل نســـــفــــــا
تكفا ترا تكفا لها هدرة السيـل
*****************في صدر حرٍ ينتف الطيـب نتــــــــفـــا
تكفا ترا تكفا لها تسّرج الخيـل
*****************ان كان لك في مجمع الخيل عسفــا
تكفا تراني من قرومٍ مشاكيـل
*****************حماية الساقه بسيـفٍ وشلـــــــفــــا
تكفا وتكفا ماتسـاق لمهابيـل
*****************تكفا تخلّي القرم لاشٍ وهـطـــــــفـــا
تكفا ترى تكفا تهزّ الرجاجيـل
*****************لولا ظروف الوقت ماقلت تكـــــــفـــا