يا الضحك قل لي علامك منت طايقنّي؟
قل لي وش اللي يشتت وضعك الحالي؟!
ماقام حظّي وظنّي خايب(ن) ظنّــــي
ورجواك ربي مادام الحظ قد مالي
ماأسب حظي بوقت الكايده لنـــّـي
مؤمن بقدر الولي الخالق العالي
يالله سهّل امور(ن) حيل مشقنــّــي
ولا خير في شاعر(ن) مايشكر الوالي
ماني بعاشق ولا هالسوق خسرنـّـي
ولاني بعايل اداري لقمة عيالي
الضيقه اللي لها شهرين تاردنـّـــي
وهم(ن) مشيّد بوسط القلب منزالي
باسباب فرقى ابوي اللي معلمنّـــي
ان الصبر يفتح الارزاق لو طالي
يالله يا مقدّر الاحوال الهمنّي
وارحم ابوي وسهّل ربي احوالي
الوضع اصبح كبير ومشغلن ذهنــّي
لا برزق(ن) اسعى ولا هالنوم يحلالي
يالله يالله على العسرات قدرنّي
وانسى همومن بصدري تقتل آمآلي