المشكله لامن تولعت با نسان
ودك بشوفه والزمن عنك حاديه
يفضحك دمعك لادرج فوق الاوجـان
مايختفـى لـو تحـاول تخفـيـه
وش حيلتك لاصرت عاشق وهيمان
والحب ماياتي علـى كيـف راعيـه
ياويل قلب (ن)في هوى الزين غرقان
واصبح مولع في هوى حب غاليـه
يرجي وصاله ينتظر طول الازمـان
يطلب عسى الايام به تلتقـي فيـه
الصاحب اللي لشوفتـه دوم ولهـان
حتى بحلام الليل اهوجـس وناديـه
وافز من نومي وانا حيـل فرحـان
واضحك ونادي واذكر اسمه وسميه
واعيش لحظة صمت افكر وحيـران
واقوم واسئل ليـش مانـي بلاقيـه
واقول وينـك مختفـي عنـي الآن
تعال لاتبعـد تـرى البعـد مابيـه
يكفي هجر يكفي بعد يكفـي احـزان
تعـال خـذ قلبـي معـك لاتخليـه
جاوب صدى صوته وقال انت غلطان
هاذا خياله وانـت قاعـد توصيـه