على عذب اللقاء .. صحّيت شمعي من قناديلـك
ولاادري كيف راح الليل .. لاهـذي .. ولاذيـة
على وعدك تجي ليلة .. وليل يطول بـي ليلـك
وقلبي ينتظر غصنـه .. علـى ميعـاد قمريّـة
تغيب .. وتطفي شموع الفرح .. وأرقب مراسيلك
وأعيش الليل مابين الأمل .. وشموووع مطفيّـة
تعذبنـي ولا بلّـت .. دموعـك حـد منديـلـك
ولا بيّـن بعينـك لإلتمـاس العـذر .. مـاريّـة
تطيح أحيان من عيني .. ورمشي يرجع يشيلـك
خطاك يمرّني .. مثل الحياء .. وأحـلام ورديّـة
أطيّر سرب قيفانـي .. وتمسـك فـي محابيلـك
تبلّيـت القصايـد .. والقصايـد فيـك مبلـيّـة
يفوح الشوق بدلالي .. وأصبـه فـي فناجيلـك
هلا .. وإقدع من خلاص الحشى .. والقلب تمريّة
يهلي بك خفـوق ٍ كـل ماغنـى .. يغنـي لـك
وتشربك العيون .. اللي مـن فراقـك ضماويـة
يذوب أحلا كلام العشـق .. بلسانـي وابابيلـك
تلعثمني حـروف ٍ بالعسـل .. والـورد مطليّـة
أسج البال .. وآسرّح .. هجوسي فـي مداهيلـك
أمانه لاتبعثرنـي .. وانـا لـك صافـي النيّـة
تعـال ولملـم شتاتـي .. وذكّرنـي مواصيلـك
قبل لايموت غصني .. في رجاء ميعاد .. قمريّـة