الغلا .. قال الغلا .. قلت الغلا روحه معاك
المشاعر طاوعت لك .. والسماوه لك سمه
والله إني كل ماجيت .. آبعبر عن غلاك
خانني حرف القصيد .. وصار فيني لعثمه
البخت ليته يجود .. ويرتوي قلب ٍ ضماك
واقعد أرتّب ضلوعٍ .. من غلاك مكركمه
ياكثر ماشالني شوقي .. وجيتك في مساك
بالليال البيض .. والاّ بالليال المظلمه
وياكثر ماجابتك عيني .. على صورة ملاك
لابس وشاح الحسن ..والتاج ..وانواط أوسمه
قلت أبحاكي خيالك .. وأرسمك وأرسم بهاك
جبت لي كرّاسه .. وقرّبت بوك المقلمه
ياوجودي .. جيت أبسلا .. واثرني جيت الهلاك
في شفاياك إبتديت00 وذاب راس المرسمه
والسبيب .. اللي من غروره .. تبختر من وراك
تهت به ..بين الحرير..وخصلٍ أشقر.. وعتمه
وإن تأمّلت .. ونظرت بعينك .. ورمشٍ زهاك
طالني ليلي .. وانا بين الكحل والسلهمه
ويش أعدّ .. وويش أخلي .. من مزاياك وحلاك
عالمٍ في البدايه .. والنهايه مبهمه
غربتي في بحر عشقك .. عذبتني من صباك
صادفتني نظرةٍ .. منها دخلت الملحمه
آتبعثر في غيابك .. وآتبعثر في لقاك
لمتّي .. لمّت شتات ٍ .. في شتات اللملمه
آآآه ياداي ودوايه .. ليتني داك ودواك
وأبتدي حرب الخواطر .. والقلوب المغرمه
واحشد جيوش المحبّة .. وابحثك وابحث مداك
لاحدود .. ولاقيود .. ولاشروط .. ولاانظمة
وأرجع أعلمك .. كيف إن الغلا روحه معاااااك
وإنك إحساس المشاعر .. والسماوه لك سمه
إن خذيت الروح .. روحي .. بابعد روحي فداك
بس قلِّي بالشفايا00 ويش ذنب المرسمه