البارحة جاني من الحب مرسال
من عقب مابيني وبينه خصيمة
وانا ترى في الحب مانيب فعال
ولا بعد ولع بقلبي هشيمة
ولا بعد غنيت في ساعة وصال
ولا ذقت الفراق وجحيمه
ولا جرى دمعي على الخد همال
ولا بعد جربت مر الهزيمة
حتى وردني تالي الليل جوال
وانا على شاهي وبسكوت ديمة
الرقم بايخ لكن الصوت قتال
مثل صوت المذيعة حليمة
قالت مساء الخير ياطيب الفال
قلت ارحبي ترحيبة مستديمة
بالعود والصفري ودلة وفنجال
واجبك يابنت الأصول الكريمة
ردت بضحكة وقالت وش الحال؟
قلت أشهد ان الحال عقبك سقيمة
قالت وهي تضحك مثل الأطفال
وانا بعد بدونك كني يتيـــمة
من يوم قالتها تزلزت زلزال
من فجعتي كني مسوي جريمة
قلت ارفعي صوتك ترى مابه ارسال
كذاب لكن المصيبة عظيمـــــة
قالت أقول ترى هرجنا طال
ممكن تصاحبني تراني وسيـــمة
واسمي الحقيقي أول حرفه الدال
لكن يسموني البنات الزعيمــــة
صحيح احب الفخفخة واعشق المال
لكن تراني طاهرة مستقيمـــــة
ماعندي مغازل ولا لعب عيال
ماعندي إلا في الشرف والحشيمة
بس الصراحة قلبي لشوفتك مال
واصبحت وحدك جالس في صميمه
فكر بعقلك واترك القيل والقال
واحذر تطيع أهل العقول العقيمـــة
وارسل علي الحين500ريـــال
اشحن بها جوال اختي غنيمــــــة
أو طقم غالي فيه خاتم وسلسال
أروح به في عرس ولا عزيمــــــة
قلت الحقيقة مانيب رجل أعمـــال
ولا ني تاجر والموارد عديمـــــــة
أنا الصراحة شبه عطال بطـــــال
وعلاقتي بالفقر جداً حميـــمــــــة
والرتب الله يرحم الحــــال مازال
محدود والمصروف رب عليمه
والدين باالآلاف والبنك شغال
ياكل فلوسي بالربا والظليمه
والسوق طايح والغلا ضيق البال
والموت والله صاير أكبر غنيمه
قالت تحمل بس والحمل ينشال
خلك شديد البأس صلب العزيمه
ياخي تصرف جعلك تصير نشال
أهم شي ان النوايا سليـــــــمة
لابد تفهمني على كل الحوال
مادمت من أهل العقول الفهيمه
قلت والله إني فاهم اللي على البال
لكن ترى هذي علينا قديمـــــــه
يابنت هذا صاير اليوم موال
للي تبي تلعب على ابن اللئيمه
يابنت ماتدرين كم فيه محتال
يلعب على الحبلين وانتي غشيمه
يابنت كم من جاهله دمعها سال
من عقب ماجات العواقب وخيمه
والبنت لأقفى عرضها بيد الأنذال
والله مايبقالها أي قيمــــــــــة
قالت تبي ولا فخلك على جال
ماهوب ناقصني نصايح حكيمه
عز الله انك لللأسف منت رجال
وانك قليل الذوق ومافيك شيمه
يلعن أبو اللي مايسطرك بنعال
حتى يعلمك الغزل يابهيمــــه
(تفو)عليك وصكت الخط في الحال
مدري(تفو)هي مدح ولا شتيمه