الله الله يا عنودٍ لا تروح و لاتجيني
كلما حاولت ابانساها تعود بشكل ثاني
ادري اني ماصغرت بعينها وادري تبيني
لكن تمرّ بظروفٍ عاصيتها وتعصاني
تنتظرني وانتظرها والهوى جرحه مكيني
بس مدري ويش تاليها وانا همي براني
الغلاء في قلبها وانا الغلاء بيّح كنيني
والله اني ماتولعت بسواها في كياني
يارسول الشوق وصلها كلامي ياضنيني
قلها اني ماقدرت انسى محبتها ثواني
اتذكرها بقلبي واتخيلها بعيني
صورةٍ تعرض بعيني من مكان اليا مكاني
واتذكر صوتها الرنان والوجه الحسيني
واتذكرها ترحبّي بعد ماجيت عاني
فاتنتني بالمحبه والمحبه من سنيني
صارلي عامين مع عامين مع عامين اعاني
من هواها من غلاهامن غرامٍ مبتليني
اشهد اني في هوى محبوبتي ربي بلاني
إيه صارت من غلاها كل لحظه تحتويني
وصْرت انادي باسمها واترجمه باحلى المعاني
الهنوف اللي تحدى المترفات بكل زيني
زينها يظهر لخلق الله خفا و الا بياني
ثغرها فيه البَردْ منظوم حوله جمرتيني
وجهها كنّه قمر ليلين مع خمس وثماني
والعيون وساع واوصافٍ تسرّ الناظريني
والجدايل سود ممزوجه بلون الزعفراني
جسمها رشيق لا ناحل كثير و لا متيني
إيتمايل وان مشت يشبه لعود الخيزراني
ويش اعدّ اوويش اخلي جوهرٍ كله ثميني
دامها لي وافيه فاناشهد ان الله عطاني
انتظر وقت الفرج واقول ياربي تعيني
ليش تقسي يازماني ليش تقسي يازماني
يازماني حبها زايد وهمي معتريني
بس اظنك مثل ما قالوا زمانٍ قلّباني
دام هالحلوه تبيني ياعساها تهتنيني
وياعسانا نلتقي بعد الفراق اللي حداني
لين اشوف المترفه من بعد غيبتها تجيني
ثم تعرْ ف اني وفي( ن ) ماختلفت بشكل ثاني