ليت السنين تمرني و تعدا
و آقف على هذا العمر ما تعديت
و الا يا ليت العمر لا مر هدا
و لا ضاع ثلثين الغلا اللي تمنيت
و الحظ من كثر المشاريه ندا
و تعبت من طرد الأماني و مليت
و الوقت جاب اللي من الحب ودا
و يا كثر ما جبت المشاعر و وديت
عشت الحياة أحلام من غير حدا
و اخذت يا ما .. من حقوقي و خليت
اللي اعرفه لو رفيقي تردى
اموت .. في حق الخوي ما ترديت
و اللي اعرفه لو خصومي تحدى
عز الله اني من خصومي تقاضيت
و اللي اعرفه لو ظروفي تصدا
للحلم في روس المراقيب عديت
و الطيب مالي عن دروبه مصدا
و لا اقول انا سويت لو كان سويت
اقولها و الصدق عندي مبدا
و انا بشر يا كثر ما اخطيت و اقديت