من يوم قالتها تزلزلت زلزال
من فجعتي كني مسوي جريمة
قلت ارفعي صوتك ترى مابه ارسال
كذاب لكنّ المصيبة عظيمة
قالت أقول اسمع ترى هرجنا طال
ممكن تصاحبني تراني وسيمة
واسمي الحقيقي أول حروفه الدال
لكن يسمّوني البنات الزعيمة
صحيح أحب الفخفخة واعشق المال
لكن تراني طاهرة مستقيمة
ما عندي امغازل ولا (لعب يهّال )
ما عندي إلا في الشرف والحشيمة
بس الصراحة قلبي لشوفتك مال
واصبحت وحدك جالسٍ في صميمه
فكّر بعقلك واترك القيل والقال
واحذر تطيع اهل العقول العقيمة
وارسل علي الحين خمسمية ريال
أشحن بها جوال أختي غنيمة
أو طقم غالي فيه خاتم وسلسال
أروح به في عرس ولاّ عزيمة
قلت الحقيقة مانيب رجل أعمال
ولاني بتاجر والموارد عديمة
أنا الصراحة شبه عطّال بطّال
وعلاقتي بالفقر جداً حميمة