يقول اللي على رجله تعلّى نايف المرقاب=يشوف الدار وأهل الدار لاحس ولا طاري
ياليت الحظ يسعفني يجبّر فرقة الأحباب=من الفرقى احس القلب به سكين غدّاري
ألد الشوف مالي حيله إلا دمعي السكاب=أجاذب ونة الأحزان وأرعى نجمي الساري
أسافر مع هوى فكري أراضي وأوديه وشعاب=على مركاي طول الليل ساهر ماطفت ناري
وإذا مالاح برق الليل يسقي ديرة الأصحاب=بكى طرف على فرقى وليفي ماهو بضاري
يذكّرني بياض الثلج والأنوار والعنّاب=وصوف في بهي الوجه شاريني وانا شاري
وإذا هب النسيم العذب يطري راعي الأطياب=زعيم البيض في وقته وهو عارف وهو داري
غريب الوصف في زوله وفي مشيه وفي الهنداب=ملك روح الشقي واخاف منه تبيح أسراري
عشقته عشق مايوصف صحيح إن الهوى غلاب=ملك قلبي واشواقي وشتت كل أفكاري
ألا ياخافق الجنحان تكفى تاصله بكتاب=وسلّم لي على اهل الدار وإعطه كل اخباري
وعلّمني عن اللي غاب في بال الشقي ماغاب=ولكن حكمة الأيام تحكم والزمن جاري
عساه بخير في وقته ويسلم حيرة الانشاب=عليه الستر من رب السما الخالق الباري