السلام عليكم ....
اصعب سؤال اللي جوابه للاسف مثله سؤال...
ماهو تفلسف الا موقف صار وأقرا ثاني بيت...
البارحه يومه سأل وش ذكرك ذيك الليال...
كان الجواب بكل بساطه من متى اصلا نسيت...
ادري ان جميع الصعوبه والبساطه شي محال...
لكنها صارت كذا واللي اهم اني دريت...
ان الحياة في بعد احبابك اذا جف الوصال...
اتعيشها لو تقتنع انك خلاص أصبحت ميت...
ياصاحبي لو كل شي يمر بالخاطر ينقال...
ماكانت العبره تولجني اليامنك طريت...
شفني قدرت احبس دموعي لكن دمع القاف سال...
ويا كبرها ساكت لكن داخل اوراقي بكيت...
عمر الحكي ماكان دافي لا ابتدى بقولة تعال...
لجل اتجاهل رجفة حروفي اليامني حكيت...
الحال من بعدك قسم بالله ما اسميه حال...
انوي على الضحكه واحس كلي خطا لاني نويت...
اتصور انك من رحلت اشوفك لجسمي ظلال...
لاشفته امشي ببتعد وأثره معي مهما مشيت...
مدام يعني في بحرك لفرحتي مليون جال...
وش فيه موجك ماركد ؟؟ ((((قربت اموت ومارسيت ))))...
يرضيك ماعادت معي تفرق اذا جالك مجال...
لاني اقتنعت انك نهايه واني ببطي مابديت...
صرت اعقد حجاجي اذا جابوك بأطراف الجدال...
انا قبل لا قالوا اسمك كني (((ميت ثم حيت)))...
تعبت اعيش الدور وافتح للمعاذير الخيال...
وأتخيل اني جيت في بالك وبانك استحيت...
وتردلي كلك وله وتقول كن البعد طال...
ومن الفرح ماعاتبك واقول ياخي مابغيت...
حتى وانا تخيل حشمتك لن قلبي لا يزال...
يكرر اسمك داخل اعماقي بنبضه لا سهيت...
قلي شسوي فيك وانت بداخلي اصدق مثال...
للحب واحساس القصيد ان عانق الليل وسريت...
ربي يصبرني على الفرق مدام الحظ مال...
وانت بيجيلك يوم تعرف ليه في بعدك شكيت...
واذا بلاك الله وعذبك اشتياقك بس تعال...
واقرى القصايد في غيابك كلبوها بيت..بيت...
بتدري ان اصعب سؤال الي يجي رده سؤال...
لا قلتلي وش ذكرك ثم قلتلك متى نسيت ...
تحيـــــــااااتي