هات القلم عندي عن الوقت تعبير = مامات حي وهاجسي من غلاته
شمسه وصفوه فيته والمعاصير = والحاضر اللي موجعٍ ذكرياته
يحز في نفسي ولاله تفاسير = الله وأكبر مقبحك ياصفاته
أن جيت أبوصف وصفه أتوه وأحير = وأشمت وأنا ماطيق هرج الشماته
مير الوضع سئ ولافيه تأخير = نبكي عليه الوقت وألا فواته
جيل الورود الحمر عشق الغنادير= الطيب اللي صان عنهم بناته
الطيب اللي حشمته للمسايير = اللي يبين فالشدايد ثباته
لايكرم اللي عن سلوم العرب غير = اللي يجي ويروح هو في خفاته
وقتٍ تغير يالسيوف الشواطير = روح زمانٍ يتعبك في لقاته
الماضي اللي له معزه وتقدير = عزي لمن فاته الوقت فاته
الله يذكر كل من مات بالخير = وصلو عليه وليتني في صلاته
أبكي على فرقا الرجال المناعير= وأقوم وأسبق من سبق في عزاته
وأقدم الواجب لو أقطع مشاوير = حتى لو أن الليل مسرى مباته
لسري وأنا أدري بالليالي مدابير= ماحدٍ عرف بالضبط موعد مماته
(نمشي على كف القدر والمقادير)= ولافيه منا شخص يضمن حياته
ندعي ولي العرش فالصبح وعصير = مع شايبٍ ماياقف الا بعصاته
نطلب رضاه مع الوجيه المسافير = وعفوه وغفرانه ونعمة سخاته
في يوم ماينفعك حاكم ولا أمير = ولايقدر أبن آدم يرقع سواته
ناقف قدم ربي حشود وطوابير = وكلٍ يحسب السيئه وحسناته
النار ماهي نار قز ودوافير = والرابح اللي رحمة الله زكاته