الصدر ضاق وحاير الدمع دفاق *** من ناظر من جاير الدمع مرهوق
دمعٍ تكبه عين عاشق ومشتاق *** ارعد سماها بالغضب وامطر الموق
إلى سفح من فوق الاوجان وانساق *** تسيل منه معيله مرتع النوق
ماحدٍ رحمني يوم الاقدام غراق *** من جور عبراتٍ تكسر بصندوق
صدرٍ من الفرقا رمع فيه دقاق *** واوجس معاليق الحشا يشلعن فوق
إلى بغيت ادله تذكرت لفراق *** طفلٍ على شل المعاليق مطفوق
طفلٍ نفل بالزين شخصات الاعناق *** عز الله انه طالني منه ملحوق
فيما مضى دنياي جتلي بالاوفاق *** وردت عدٍ قبل ماهوب مطروق
جيت الحبيب دالهٍ بالكرى راق *** ومجوهرات مبيسمه ذقتهن ذوق
يوم انتبه لي صاحبي عقب مافاق *** دلى يعاتبني على الغدر والبوق
يقول ما مثلك للاجواد سراق *** ولا انتب على هذا من الناس مسبوق
قلت اعذرو ما زاركم ماله ارفاق *** وروس الافاعي بالقدم حطهن سوق
ماله صديق وبه يضيق الآفاق *** وليا جفيته ما يبي كل مخلوق
واسفر حجاجه وابدل الوجه باشراق *** وافتر عن بيضٍ تكاشف بها بروق
منهن سقاني كاس خمرٍ بترياق *** زودٍ على ما فات بالغدر مسروق
احباب لاحباب تعاطوا بالارياق *** وارواح تحيا بين عاشق ومعشوق
هو حط ذرعانه لي فراش وارواق *** وانا لويت العضد لمعنقه طوق
عليه من شقر العكاريش دلاق *** تزها لجسم فارع الطول ممشوق
ثوبه نظيف ولا وطا فيه عشاق *** وثوب الخنا يجوز به كل منطوق