لو صَحًّت الأمثال في كل الأحوال = ماشفت واقعنا خضوع وهزيمة
والمجد لو ينفع معه سبك الأقوال = إنْ كان صرنا اليوم أمة عظيمة
كالببغاء نحفظ قديمات الأمثال = نبقى نردّدها ولو هي عقيمة
نقول قال فلان وفلان ماقال = ومن حاد عنها نحْسِبِه مع حريمه
مثال قالوا : كل مطرود ينطال = وحنّا نطارد والنتيجة أليمة
ضاعت قضايانا ولافيه رجَّال = منا يرد الفاجعة والظليمة
نقول حنا بالزمن خير الأجيال = وحنا هل النخوة وساس الغنيمة
وحنا الشيوخ وغيرنا أنجاس وأنذال = وحنا النظاف أهل القلوب الرحيمة
وحنا نهار الموت قاسين وأبطال = لاواعذاب اللي غدينا خصيمة
رضيعنا ينطح ثمانين خيال = وسيوفنا يوم التلاقي كريمة
بالحكي والتنظير نحقِّق أهوال = وأفعالنا للي حسبها عديمة
يبزغ علينا هْلال وإيغادر هلال = وشبابنا ياشينهم من ضميمة
نحْيِي ليالينا برقصة ومواّل = ونْسمِّي الخلوة صداقة حميمة
مكتب وضيعة وقت جلسات ودْلال = أقصى أمانينا حضور الوليمة
ناكل طعام ونلبس شماغ وعقال = مستوردينه أحدثه مع قديمه
أجسامنا صارت شبيهة بالأفيال = من كثر ماهي في رخاها مقيمة
متشيِّمينن عن شريفات الأعمال = ومتفاخرينن في علومٍ قديمة
(فلان صانع ) عندنا اليوم تنقال = للي نعدِّه من أصولٍ سقيمة
حياتنا لولا صناديد (بنقال ) = ماظنّها للي بغاها كريمة
وحلالنا لولا مساكين ( نيبال ) = يضيع منّا في عجاج الكتيمة
أقلَّها لو يضرب اليوم زبَّال = عن العمل نعيش عيشة بهيمة
ماحب جلد الذات في كل الأحوال = ولاني من أهل السخرية والشتيمة
متفائل بطبعي ولاني بمياّل = لأهل التخاذل والحكي والنميمة
لكنْ طفح من ذلّنا كل مكيال = والنار في جوف العروبة ضريمة
أطفالنا ماهم مثل كل الأطفال = أنفاسهم جمرٍ تعاظم
واسلامنا دمه كما نزف شلاّل = الموت صوته والتفكك نديمه
دين الله اللي لأجله استشهد أبطال = اليوم صار لتابعينه جريمة
اسلام خالد مع عمر طيب الفال = اللي جعل مبغض محمد غريمه
النصر يبغى من قوى حمل الأثقال = يوم الفشق متشابك مع صكيمه
النصر ماياتي بقصة وسلسال = ولاتجيبه أغنية ( يايتيمة ) !!
النصر مايشرى بدولار وريال = حتى لو النيات فعلاً سليمة
النصر ماهو مال والله ماهو مال = النصر إيمان وصمود وعزيمة
النصر تكبيرة جهادٍ إلياحال = بطش العدو عن الحلول الحليمة
متنا سياسة وانتفاضة وترحال = والغازي المغرور زوّد جحيمة
وش يذْكِر التاريخ من بيض الأفعال = دام الوجيه اللي رجينا دميمة
ومادام أخو روبي وكوكو وفريال = ماحرِّكه ذل القهر والهزيمة
شعر \ حمدان بن سالم العنزي