صفا ليلي وزانت لي القوافي=ونفس طايبه والبال صافي
عـــلى طعس مرابيعه تسلّي=بنص الشهرفيه البدروافي
وخيمه تصــطفق فيها الهبايب=وشبة نار تجــذب كل لافي
ونسناس الهـــوا بالهون سيّر= يداوي جرح بالأحشاء خافي
هدوءالليل الهب لي المشاعر=وزاع القلب وضلوع نحــافي
ماأحـــوجنا لنسيان المشاغل=بوقـت ماحصـلنا فيه كــافي
صخب وإزعــاج مانرتاح لحظه=وهم القلب له فرش ولحافي
وكلا في المشاغل شـد حيله=يكـــود إنه يجي للنوم طافي
وتسـأل ماتلاقـي لك إجــــابه=سـؤالك راح بالزحمه عوافي
ويأأصحاب الركــاده والرشاده=زعيمين الثقيله والخـفـافـي
لنا ماضــي تســـلينا عـلـومه=مثل شمس تخلي الكون دافي
بنوه أهـــل المروّه والشهامه=جــدود أقــل مـافيهم ســـنافي
لهم رايه على هـــــام العلايا=هــل العادات وقلوب نظافي
رســـاله للذي يسمع جوابي=حضارات بلاماضـي عجــافي
وياجيل الرخـــــــا لحظه تدبّر=ومن جرّب بهذا الوقت شافي
ترى الأيـــــــام طلعه ثم نزله=قبل لاينتهي وقتك حسـافي
سواير سنّها أهــلك وربعـــك=عـــــوايد ماعليها من خلافي
تجـــــوّد بالجميل من الوصايا=ودع عنك الضعيفه والخرافي
ترى من عــــــزها يزداد عزك=مثل بــرق بتالي الليل زافي
وحنّا بـــدو حتى في التحضر= أصــــــالتنا علينا ثوب ضافي
وصلوا عــد ماهــــلت مطرها=على رمـز الطهاره والعفافي