واجه الواقع ترى مالك مفر ** لايردك دمع تعذيب الضمير
وأعلن الفرقا على كل البشر ** خل عدوانك من الفرحه تطير
وأحفر لحب ٍ مضى بيدك قبر ** وأدفنه وأذكر ليالينا بخير
وعز نفسك وأمسك عنان الصبر ** ورش قبر الحب بدموع النظير
لاتندم لاتكابر بالخبر ** خل كل الناس تعرف وش تصير
قلهم وش صار في فايت شهر ** قلهم حبل الكذب عمره قصير
برر الموقف على سكة سفر ** عش حياتك وأذكر الحب الكبير
وإن دعاك الليل في ليل السهر ** واصل المشوار لالا تستخير