السلام عليكم ورحمة الله وبركاته ...
كيف حالكم شباب ؟؟ وانتوا بنات كيفكم ؟؟؟
إن شاء الله كلكم تكونوا بخير وصحة وسلامة ,,,
×××××-------------------- ملخص الجزء الأول --------------------×××××
أنا رحت الفيصلية أبي أتعشى وأتسوق ,,, وتفاجأت بزحمة غير طبيعية بالسوق ,,, سألت عن سببها وقالولي لأن هشام جاي السوووق
واللي يبي التفاصيل كلها يدخل على هالرابط:
http://www.al-wed.com/vb/showthread.php?t=94689
×××××----------------------------------------------------------×××××
المهم يا حبايبي يا حلوين بندخل بالجزء الثاني الحين ,,, يمكن يكون ثقيل دم شوي بس هذا اللي طلع معي
وآسف إني أخرته عليكم شوي بس ظروف والله وأنا أخوكم ,,,
×××××-------------------- الجزء الثاني --------------------×××××
المهم يا طويلين العمر وتلمع في رأسي فكرة جهنمية وتنور لمبة فوق راسي وأقول : وجدتها ,,, وجدتها <<<< مهوب عاقل أرخميدس
وقلت ما دام كل هالأمم والعالم والناس جايين عشان هشام ,,, وكل هالسحليات جايات عشان هشام ,,, حرام أخليهم يرجعون بدون لا يشوفونه وينكسر خاطرهم <<<< يحب عمل الخير هالولد
وقلت ليش يا ميشو يا أبو المش ما تسوي نفسك انت هشام وتدخل السوق وتاكل الجو كله
,,,
المهم وأروح أدورلي طريقة أصير فيها هشام ,,, وأفكر وأفكر وأفكر وأفكر إلين مل مني التفكير وعطاني الفكرة عشان يرتاح
وأروح ألبس لبس غبي شوي زي لبس الشباب اللي بالأكاديمية ,,, لبست لبس كذه برتقالي على أصفر على بنفسجي ,,, قوس قزح يعني ,,, وأوقف شعري زي شعر هشام وأعلق ورقة على صدري وأكتب عليها ((هشام يحدثكم))
وأقول كيف هشام يدخل الفيصلية بدون حرس شخصي !!! لازم أدورلي حرس شخصي ,,, وأفكر وأقول مالي غيرهم ((الرومنسي وأعانق هم)) مافي غيرهم ينفعون لهالمهمة ,,, دبب ما شاء الله عليهم وأشكالهم تخوف وينفع يكونون حرس شخصي
وأدق على الشباب وأجيبهم ويجون وأقعد أشرحلهم الخطة ولا فهمها الرومنسي ,,, عجزت أفهمه ولا فهمها ,,, وآخر شي يوم عجز يفهمها بالكلام قلبت ظهر أعانق هم سبورة وشرحتله الخطة وفهمها أخيرا
طبعا خطتنا كانت 4 - 4 - 2 ,,, الخطة كانت إن أنا أسوي هشام وهم يسوون حرسي الشخصي والبنات المعجبات اللي بيعطونا أرقامهم يتقاسمونها الرومنسي وأعانق هم ,,, أنا مابي أرقام بنات أنا خاطب
والشباب يوم سمعوا إن الشغلة فيها بنات ما كذبوا خبر ,,, قالوا قدام بندخل معك مكان ماتبي ,,, ونصير حراس شخصيين وحراس مرمى بعد لو تبي ,,, وألبسهم بدل سودة ونظارات وحركات وندخل السوق
المهم وندخل الفيصلية ,,, وأول ما ندخل جاك الرومنسي مسوي زعط ويشوف واحد على الباب ويرزح عنده ويقوله وسّع يا كلب ويسطره ذاك الكف
واكتشف بعدين انه من أمن السوق وبغى يجيب فينا العيد بس تلايمنا على الموضوع واعتذر للأمن ومشانا بدون مشاكل ,,,
وندخل السوق وأول ما أدخل ساد الصمت أرجاء الفيصلية <<< آه يا مثقف يا أنا
الكل مصدوم ومتفاجئ ,,, وبعد دقيقة صمت انطلقت صرخات البنااااات :
هشاااااااااااااااااااااااااااااااااااااااام
من قوة الصرخة طفت نص لمبات السوق وتكسر قزاز 20 محل وحصل 4 حالات وفاة و 10 حالات صرح و 23 إصابة خطيرة في القزحية
وتلت الصرخة سلسة من الإغماءات في صفوف البنات والإسعاف من كثر الإصابات ما عاد تلحق سياراته وصاروا يجون بتكاسي ,,, وبعدين خربوها وصار يجون بسياكل
المهم وأمشي بالسوق وكلي ثقة وفخر واعتزاز ,,, والبنات حولي طقاق عشان يلمسوني ,,, واللي تعطيني دفتر أوقع عليه ,,, واللي تعطيني منديل آخذه أمسح فيه وجهي وأرميه ,,, واللي تعطيني وردة ,,, واللي تعطيني دبدوب ,,, واللي تعطيني كف
وتجي وحدة بدوية وتقول هشام واللي يرحم والداك وقعلي هنيه
وبعد بحث وتحري اكتشتفت انها تحسبني هشام أحد أبطال المسلسلات البدوية اللي كانت تطلع على غصب1
المهم وأنا ماشي ومبسوط بحالي وبالهيصة اللي عاملينها عشاني اتفاجأ بندوووو قدامي وتقووول: ميشووو يا الدب وش جابك هنا ؟؟؟ وليه لابس كذه ؟؟؟؟
وهي قالت كذه وليتها ما قالتها ,,, رسايل الإعجاب والورود انقلبت جزم وكعوب على راسي ,,, والأيادي اللي كانت تنمد عشان تسلم علي انقلبت بقووووس بوجهي
<<<< مدري ليه يسوون فيني كذه مع اني أحلى من هشام !!!!!
وأنا أشوف الدعوة خربت وأدور الرومنسي وأعانق هم وألقاهم شمعوا ,,, وأقول مالك إلا تلحقهم ,,, واللي يحب النبي يخلي ,,, وهاتك يا ركض وركض وركض ,,, والأمم كلها وراي بالنعول والكعوب ((الله يعزكم)) ,,, ووالله قلبت لاعب أولمبيات من الخوف ,,, قفز حواجز ,,, تسلق جبال ,,, ركض ,,, جري ,,, حديد ,,, خشب ,,, كل شي ممكن أسويه سويته عشان أهرب من هالأمم ,,,
وأطلع من الفيصلية ولكن بعد ما جتني الإصابات التالية:
شد عضلي في أصبع رجلي الصغير ,,, كسر في أحد الرموش ,,, جلطة في الشعر ,,, وحروق وندبات في كل جسمي ,,,
بس أنا كان قاهرني الحروق من وين جت ,,, واكتشفت بأن الشباب الله يعافيهم كانوا يطفون سجايرهم فيني
وحاليا والحمدلله تشافيت من الإصابات ,,, وأخذت عهد على نفسي إني ما عاد أكذب مرة ثانية ,,, وهذي كل السالفة يا حلوين ,,,
×××××-------------------- ما يستفاد من الموضوع --------------------×××××
1- الكذب حبله قصير ,,,
2- هشام دب وبايخ وبسببه تسطرت إلين شبعت ,,,
3- ندووو مو نذلة أبدا ,,, بس هي كانت تمزح معي
,,,
4- أنا كنت مشغول شوي عشان كذه تأخرت بالجزء الثاني ,,,
5- لو ما رديتوا علي بأسطركم وأطلع حرتي فيكم
,,,
×××××----------------------------------------------------------×××××
أتمنى إن الموضوع يعجبكم ,,, وأنتظر ردودكم بفارغ الصبر ,,,
أخوكم:
مشمش ,,,