منتديات الـــود - هنوف(ن) لإجلها..سقت القوافي والسطور اجنود

الرائع!!! رائع دوووما بكلماته وعذب معانيه وخياله الوااااسع قصيده او قد اسميها رائعه من روااائع قصائده ... قصائده هي التي تثبت له
نامل ان تكون محط اعجابكم يا همس القوافي.....

’’’’’’’’

على طاري سحاب الصيف تعالي ياهبوب النـود
تعالي داخل اضلوعي ؛ سحابة صيـف وسميـه

هواها طار بضلوعي؛ وصواعقها مطر ورعـود
واحس ابداخلي برق(ن).. رفيفه يشتعـل ضيـه

سرى بارق.. هواجيس السهارا والرخوم اهجـود
على صدر المساء تضـوي بروقـه دار نجديـه

هنوف(ن) لإجلها..سقت القوافي والسطور اجنود
وابحشد له من جيوش الشعـر والحـرف آلفيـه

انا ماجيت بإحساسي على الفاضي بـلا مجهـود
وقلب المؤمن يدلـه ... ويكشـف كـل مخفيـه

واذا كان المثل صادق وصحيح ان القلوب شهـود
ابرسله مـع حروفـي ؛ رسالـة شـوق برقيـه

سؤال ينهش ضلوعي..انـا فـي قلبهـا موجـود
وهل تدري عن الخافي...!! تراهـا كـل مافيـه

نبت فـي حبهـا قلبي...مثـل ماينبـت العنقـود
بدون اسباب ياويلـي .. ولكـن جـات عفويـه

انا اللي حاكم(ن) قلبي.. بسبـة حظـه المقـرود
سجنته داخل اضلوعه.. وكتبت الـروح محميـه

وانا اللي اخذت من قلبي على قلبي ثلاث عهـود
"يصون النفس من طيشه "يروف" ويحسن النيـه"

احاول انصحه لكن...يماطـل بالسهـر و يـزود
ويقول الليـل ياسـاري.. حشـا مافيـه ماويـه

هنوف(ن) مايعيبها.. ولو طال السمـاء نمـرود
تراها اطهر من عروق الثرى .. واطهر من الميه

كريمة نفس ماترضى .. توطي راسها المكـدود
شموخ(ن) مثل هامات النخيل ... وطلعهـا زيـه

اصيلة ما مشت درب الخنـا والعيـب والمنقـود
وانـا والله... مـا شكيـت فيهـا نـص بالميـه

لباقة هرجها العاقل .. سرق عقلي بدون حـدود
خفيفة ظـل.. او تشبـه خيـال الظـل والفيـه

تحلت بالادب والذوق على جملـة بنـات الخـود
وانا ما شفتها لكـن ... اظـن البنـت حوريـه

هنوف(ن) اسمها يسبق.. بطيبه ذاريـات العـود
هلابـه كـل ماشفتـه.. لـزوم اقـول ياحـيـه

عسى الله بس يكفيها عيـون الحاسـد المحسـود
ويسترهـا وياقاهـا .. مـن الشيطـان والسيـه

وعساها ترحم اللي بات من طول السهر مرمـود
ثلاث ايـام و عيونـه ..علـى الاوراق مبليـه

ابيها تحيي الماضي.. وتفتـح دربـي المسـدود
وانا والله ما اغيـر .. شعـور(ن) ظنتـه فيـه

وابيها بلسم جروح(ن) بسبـة لغزهـا المنشـود
ثمان سنين ماخنـت العهـد.. والـروح منهيـه

ابيها اليا انتخت صاحت : انا لعيناك يابو سعـود
وانا لعيونهـا ابصـرخ: فدتـك الـروح ياخيـه

ابشعل لاجلها شمعـة زمانـي والليالـي السـود
واجيب لها القمر والشمس على كفي وهـي حيـه

يقولون العرب دايم .. عطايا الجـود بالموجـود
وانا اقول العطا نعمه... ولو فـي حجمـه بليـه

ياويلي كان ماحست ... بقلب محمـد المشـدود
حرام اني ل.اسوق الشعر.. ليـن يمـوت بيديـه

مادام ان السهر يصبح على درب الغلا المسـدود
ابكتب له قصيده حب .. بنفـس القـاف مرثيـه

وابكتب في عيون الناس..انا من بعدهـا مفقـود
انا اللي مات باسبابه.. وانا اللـي يدفـع الديـه

ــــــــــــــــــــ
الشاعر / محمد العضياني
ــــــــــــــــــــ

تحياتي لكم

ودمـــــــــــــــــــــــــــــتم ’’’