منتديات الـــود - ياسرع الجعري

الجعري الله يعزكم اللي هو الكلب المهم القصه هذي والله واقعيه وصارت من جد...
وانا صغير كنت اروح مع ابوي الله يطول عمره المهم في سنه من السنين انغلثت الكلاب والحصانيه والذيابه (والانغلاث مرض معدي
يصيب هذه الحيوانات وتجيب داء الكلب لاي حيوان تعضه )
المهم مالكم في طول السالفه رحت انا وابوي وواحد من اخوياه اسمه ابو عبدالله نطخ هالكلاب المنغلثه على ددسن 82 وانا ورع راكب
بالنص (الحمد لله اللي ماشفتوني وانا في هالمرحله :D ) الوكاد طلعنا العصر عند البعارين والغنم ورحنا نذبح فالكلاب هذي الوكاد يوم غابت
الشمس قريب المغرب قبل الظلام بشوي رجعنا يم البعارين ابوي يسوق وابو عبدالله راكب على الباب وانا مفرشخ بالنص المهم ولين هذاك
الكلب الله يعزكم يركض جنب السياره ومنغلث قال ابو عبدالله عطوني الشوزن على باله بيجيب راس كليب قلت له الرصاص مخلص وفعلا
الرصاص خلص رميناه كله الوكاد الددسن تمشي حوالي 80 كيلو بالساعه ابوي حاطن رجله ابو عبدالله يحسبنا مهدين يوم يشوف الكلب
جنب السياره والله يذكره بالخير وهو يفك الباب يبي ينزل يطرد الكلب بحصاه ، المهم عهده بنفسه يوم نّزل رجله ، تعرفون يوم ترمي قرطاس
والسياره تمشي كيف صوته ، سسسسسسسسسسسسسسسف والرجال يطير ، وابوي يلتفت لين ابو عبدالله ماهو فيه قال لي ياطحيمر (طحيمر
طبعا مو اسمي بس اسمي فالصحافه :D) قلت سم قال الرجال وينه ؟ قلت ماتروح مراحه الرجال غادر في رعايه الله .
والله وابوي يوقف يوم وقفنا ولين العج ورانا واقف وناخذ شوي نستنى العج يروح يوم خف الغبار ولين ابو عبدالله طايحن على بطنه ويدينه
ورجلينه كل وحده بوادي، والله ونجيه نركض يابو عبدالله انت طيب؟
ولين براطمه متنفخه وكله رضوض ، متكسور من جد وابوي يقوم عليه ياخي الشياب تهاويل بدال مايقول له الحمد لله على السلامه يهاوشه
ويشب عليه انت صاحي والا مجنون يوم تنزل والسياره تمشي؟ وهو يرد بصوت واحد يبي يبكي بس مستحي مني يقول وانا وش دراني ان
الذيخ سريع ملعون الوالدين ( حاقد ) *l .
الوكاد ونركبه معنا وحالته حاله قاله ابوي اوديك المستشفى قال لا والله ودني نجيب رصاص لملعون الوالدين(قصده الجعري )

وطول ليلناوحنا نضحك منه الله يذكره بالخير....
وسلا1111متكممممم وإنتطروني في قصه جديده....

مراسلكم في الود: انــــاكـــــونــدا ؛؛؛ :D