منتديات الـــود - مــهـــمـــا جـــــــــرى !!

ليش ياصبري تململ ماخبرت انك .. ملول ؟!
ليش ماهي عادةٍ لك لو جرى مهما جـرى !!

خابرك لو حاولوا بك ماتضيق ابـك السهـول
صدرك أوسع من تفاكيـر المشيّـب للـورى

ليش قلّي لاتـردد وش حصـل لـك لاتقـول
اذهلوني في زمانـي ليـن حاربـت الكـرى

ثمّة انصاف الرجال اللي تزايـد فـي ذهـول
مظهرٍ خادع وبـارع فـي تصاويـر الهُـرى

لو يقول الراس وينه ماعلى متنك حمـول ؟!
شلتها يدينك على راسك تحسّس ماجـرى !!

وبعضهم لو يتبيّن صار مثـل اختـه خجـول
مايواجه وان تخفّى عنك باعـك واشتـرى !

خابرك ياذخر عمـري لاضعيـف ولا زعـول
مايهزّك لو تجيك اكبـر مـن طويـق وكـرا

ليش أحسّ انك تردّى من نحولٍ فـي نحـول
الجبل مهما يصـادف مـن عوامـل مـادرى

ادري انك في زمـانٍ مااقـدر اقـول معلـول
حكمة الله يرتضيها كـل مـن فـوق الثـرى

وادري انك في مصادم بين طايـش ومهبـول
مايفرّق فـي حياتـه بيـن أبيـض واسمـرا

صبري له قصّه طويله وينكم ياهـل الحلـول
يالحميدي حطّهـا وسـط الجريـده تنقـرا !!

ليتهـم يابوحمـد ياتـون بالحـل العـجـول
وياتُرى من يجلب حلول الوسط لي . ياتُرى ؟!

يوم صبري من زمانه قام يشعب لـه ذلـول
منذهل فـي كـل حالـه لاطرالـه .. ماطـرا