السلام عليكم ورحمه الله وبركاته
هذي قصه مأساه حصلت لي شخصياً
بطلها انا وعلي
ووتقدر تقول ان بطل هذي القصه انا وروحي لان علي هذا كان اغلا علي من روحي والله
وترخص لعيونه
قبل لا تقرون القصيده ابقول لكم كم كلمه يمكن تحسون بمعنى الحرمااااان انك تنحرم من اغلا واحد بحياتك
ما اخفيكم والي رفع سبع وطمن سبع
انه بدا ينافس غلات امي وبوي
اقصد علي
بقول لكم بععض المواقف الي صارت بيني وبين علي على سبيل المثال لا الحصر ولا المواقف والله كثيييييييييييره مرررره
علي هذا اعرفه من زمان ما تتصورون قوه العلاقه الي بيني وبينه
الى درجه اني ما استغرب اذا قمت من النوم ولقيته بغرفتي قاعد ولا يشغل المسجل ولا ينتظرني اقوم
لان كان معه مفتاح بيتنا بس عشان تتصورون قوه العلاقه الي بيننا
مع العلم اني ساكن مع اهلي ومن عايله محافضه يعني ما يقدر يشوف اهلي او اننا نجلس سوا مع امه وخواته
او امي وخواتي
يعني عشان تتصورون برضو قوه العلاقه
ما استغرب اذا امه دقت علي وقالت تعال خذني للمكان الفلاني
علي هذا اول ما طلع سياره والله وقبل لا يركبها جاني وعطاني السبير وقال والله تحرم علي ان ما اخذت المفتاح
والمواقف كثيرره والله تتعب وانت تعدها وكل موقف والله يثبت على رجولته وشهامته الله يرحمه ويجعله بالفردوس الاعلى لكن ما ابي اطول عليكم

ابي اقول لكم بدايه الماساه

علي اصيب بفشل كلوي
وانا سويت اجراءات عشان ابي اتبرع له
طبعاً بكل سريه ولا احد يدري والله
سويتها بمستشفى خاص
وعلى حسابي الشخصي والله
حتا اهلي ما يدرون عن الي انا مسويه
والحمد لله
طلع جسمه يقبل الكليه لو اهديتها اياه
لاحضو اهديتها مو تبرعت

طبعاً بلغته وقلت له السالفه
علي رفض وقال لا تعب نفسك بيشفيني الله
والحمد لله وبقدره قادر مع العلاج والادويه حمد لله طاب ورجع كما كان

وبختصار
علي الله يرحمه توفا بحادث سياره
مع العلم انه كان مكلمني قبلها بيوم
وكنا ناوين نطلع نخيم اذا رجعت انا
وقعد يوم بغيبوبه ثم توفا
انا ما كنت بالرياض كنت مسافر برى المملكه
اول ما جاني الخبر رجعت للرياض على اول طياره
وانا والله ما هنيت لا بنوم ولا اكل والي خلقني
يعني اصابتني رعشه وخوف
والله العظيم اشبه ما تكون بيوم القيامه
استغفر الله
وصلت للرياض اخذت السياره طوالي ع المستشفى
والله حتا شنطتي نسيتها مع راعي اللموزين
وحطها بالرسبشن حق المستشفى
طبعا دخلت للعنايه المركزه
واجهت امه وابوه واقفين عند الباب
امه اول ما شافتنيجتني مسرعهو ظمتني بقووووووه
وقالت محمد رفيق عمرك بين الحياه والموت وهي تبوس يديني
وتقول لي انت فيك من ريحه انت اخر واحد نطق اسمه قبل لا يغشى
هذا والله كلامها لا زجت ولا نقصت فيه
انا اول مره بحياتي تلمسني حرمه
غريبه عني
مع العلم انها كبيره بالسن
0000والله يا جماعه اني اكتب لكم هالموضوع وعيوني صبابه لي اكثر من ثلاث ساعات اكتب هالموضوع مع العلم اني سريييع مرره بالكتابه000000000000000مو قادر اوقف دموعي 000000
طبعاً ابوه مستحي مني ويصبر نفسه سلم علي
وحبيت راسه
وقلت له سلامات ان شاء الله سليم ونرجع زي اول
وابي اطمنه
وفجاه
التفت ووخر وجهه عني
كلمته وقلت له يا عم وش فيك
قال محمد انت ولدي لو راح علي
وانا اطمن فيه
اخر شي قال لي
تعال ابيك بكلمه
طبعا ام علي طول الوقت تطالعني بنظرات والله بكتني
مدري فيها تساؤلات غريبه
ما فهمتها
المهم رحت مع ابو علي
وقال لي محمد انت تعرف علي
اكيد انه يعلمك باشياء محد يعرفها الا انت وياه
وتراني ابوه لا تخبي علي

وقعد يسالني عنه
وانا اجاوبه
اخر شي طلع الدكتور
وقال لنا ان شاء الله الحاله مستقره
وما فيه الا كل خير

وجت الفاجعه
بعد اربع ساعات من المرابطه بالمستشفى
جا الخبر الي هدني حيلي
الي خلاني اسهر ايام ما انام
قال الدكتور وبكل برود
من والد علي
قالابو علي: سم
قال لنا وهو يناظر الارض احسن الله عزاك
وان شاء الله انه يسبقكم الى الجنه
انا طبعاً طلعت شياطيني
والله تمنيت اني الحقه لكن حمد لله على كل حال
طبعاً الام اغمي عليها
وابو علي ارتفع عليه الضغط
وما بقيت بالغرفه
الا انا وجثه علي
والله اني اطلع واضرب نفسي انا بحلم ولا بعلم
والله من قوه الحزن الي فيني
مني قادر احزن
قمه القهر انك توقف قدام شي يستصعب عليك ولا تقدر تسوي شي .......يتبـع

.....قمه القهر انك توقف قدام شي يستصعب عليك ولا تقدر تسوي شي

قعدت ابوس فيه وامسح راسه واسولف له عن الي سويته يوم سافرت
والله ولا كنه ميت
مدري وش جاني كل ما ذكرت هذا الموقف احس اني مجنون
ابختصر السالفه لاني طولت عليكم ولا الكلام واله واااااجد
ووصف الحاله الي اصابتنا فوووق انه ينوصف بكلمه ولا سطر
جا موعد الدفنه
وهذي الساعه الي ايقنت انه فعلاً الي صار صدق
صلينا عليه
ولله الحمد الي صلو عليه كثييييييييييييير مره مره
وكلهم من معارفه
مشا الله علي كانت سمعته حلوه ومحبوب من الكل
جا مو عد الدفنه
وشلنا جثته على كتوفنا
وصلنا للمقبره
وانا دموعي مو مخليتني اعرف اوقف من شدتها
نزلناه للقبر
وتمنيت اني اكون بجنبه والله
انا نزلته بقبره بيديني الي اكتب لكم فيها
نزلت علي الي كان اغلا علي من نفسي
وعيوني
وروحي
ودفناه طبعاً الناس والله كانو يحسبوني اخوهمن كثر دموعي
ويقولون خلو اقرب الناس له يدفنه
خلو اخوه يدفنه
ونزل ابو علي معي
دفناه
وانا طبعاً مو مستوعب الوضع
والله ما تتصورون حالتي
يعني مهما قلت اعجز اني اوصفها
دفناه
دفنت بيديني شخص حبيته من كل قلبي
وهو اخلص لي من كل قلبه
دفنت شخص لو طلبت روحه ما بخل بها علي

ادري طولت عليكم
هذي هي السالفه باختصار شديد
واترككم مع القصيده مع انها مو كامله لان خانتني الذاكره فيها
هذي اغلبها


كان لي عبر الزمان الاولي ===== صاحب من اخوتي يدعى علي

تسكن البسمه في مبسمه ===== دائم البشر كبدر مقبل(ي)

لم يغاضبني بعمري مره ===== وكلام الزور ما قد قال لي

صاحب افديه بالنفس وما ===== ملكت نفسي ومرأ مقلي
غاب عني ذات يوم(ن)باسماً ====مشرق الوجه بعيد المأمل(ي)

لم يكن يعلم ما خبأه ===== دهره عما قليل ينجل(ي)

غفلت عيني فقالو راحل ===== ليته يا ليته لم يرحل(ي)

غفلت عيني فما ابصرته ===== فغلى قلبي كغلي المرجل(ي)

يا علي ترحل ما ودعتنا ===== اي ذنب قد جنينا يا علي

لم تصافحنا وما ودعتنا ===== لم تبادلنا حديث القبل (ي)

لم تمتعنا باخر بسمه ===== كبتسامات الزمان الاول (ي)

يا علي يبكيك عيسى انه ===== ذو فؤاد محرق مشتعل (ي)

لم تدع فيه الهموم موضعاً ===== ما به نار وجرح يصطلي (ي)

ويهيم الدار نايف سائلاً ===== اين علي لم يعد للمنزل (ي)

اتراهم صدقو في زعمهم ====== ليته يا ليته لم يرحل (ي)

يا علي تبكيك ام طالما ===== اسهرت جفناً لكي يهنا علي

ولكم صامت لكي تطعمه ====== وعليه كم بنت من امل(ي)

فجعت فستسلمت صابره ===== يا بنفسي الصابر المتجمل (ي)

يا علي ان فرقت اقدارنا ===== فلقانا عند مولانا العلي

ولان فارقتمو ابصارنا ===== ورحلتم كالنجوم الافل (ي)

لم ابدل خل قلبي لم يزل ===== صاحبي عبر الزمان الاول(ي)

واذا الذكرى اناخت رحلها ===== واتى باليل طيف من علي

فارفع الكفين واسال ضارعاً ===== لعلي الخير اعلا منزل (ي)

رحــم الله عـليـاً كـلما ===== اعلن الاشراق صوت البلبل(ي)

يا ابا عمار كم من بـاكـي(ن) ===== قد بكا دهراً ولم يستحمل(ي)

قدر الله فسل من مصطبر=====واحتسب اجراً الا ان تنجلي

ما عرفناه علياً انما =====هالني ما قال ذاك العبدلي



ملاحظه:
ابو عما ر هو لقب علي رحمه الله

طبعاً امه لما سمعت القصيده حلفت محد ينام بغرفه علي الا انا والى الان بين فتره وفتره امه تدق علي وتقول لي تعال سير علينا واقعد انا وبوعلي وامه الله يطول بعمارهم حتا اخوانه الصغار يكونون معنا...........


واعذروني على الاطاله...واعذروني برضو لانه خانني التعبير اني اصف شعوري.... وللامانه هذي والله اول مره انزلها بمنتدى..
ولكم تحياتــي...