يا جرح يالي في الظماير خفيته
لي عشرة اعوام ونا فيك منصاب

على وليف يا هلي قد هويته
حبه ملك قلبي من الباب للباب

ارخصت له نفسي وقلبي عطيته
يشهد لي الرحمن ما ني بكذاب

ياما تواعدنا ويا كم جيته
وياما سهرنا الليل في جو جذاب
...
لكن زماني هد ماقد بنيته
لا همه أخساير ولا همه اتعاب

سافر حبيب الروح ياناس ليته
يذكرأسيرله ولو عن بخطاب

عيوني القشرى اِلى شفت بيته
تهل دمع ينحدر فوق لهداب

ان كان ينساني فنا ما نسيته
حبه بوسط القلب ركز له اطناب

بالصد والهجران لا ما نويته
مهما يطول البعد ويزيد لغياب

والله لذكر صاحبي ما نسيته
لو كنت فلتسعين والراس قد شاب