اذكر الله وابتدي زين المقاله
واكتب الابيات في حــب الخجوله
كنّها ظـــبيٍ تـــخوف من ظلاله
والتفت من عـــقب مافز بجفوله
والعيون اللي تسولف عن جماله
يسرق الخافق هدبها بالسهوله
لاتكــلم ســاق فكـري في دلاله
سايقٍ قـــلبي على رغبة ميوله
والحرير اللي تــثنى باستماله
يذهلك في منظره ساعة نزوله
والشفايا كنها .. دم الغزاله
لونها فالقلب له صوله وجوله
وان مشى في مشيته ماشاف حاله
فيه من معنى البراءه والطفوله
والله ان الهرج لاجا في مجاله
في عيوني يبتسم واشوف زوله
الفخر والمجد صارت له سلاله
وان بغى شيٍ فهالدنيا ينوله
ياصغير.. صاحبك لاضاق باله
يتلفت ودّه انك صرت حوله
مادرى انّه غافيٍ باقصى خياله
يطرد احلامه وحلمك مايطوله
والظروف اللي حدتني عن وصاله
ويش اوصف ويش اخلي ويش اقوله
آآه ياهمٍ علّي صعب احتماله
صعب تحقيقه والاصعب في وصوله
صرت اعيش الصمت والكتمان حاله
والغموض اللي ملكني وش حلوله
كنت اشوف الحزن في عرق السياله
كل ماهز الثرى جافي خيوله
كنت راجع ينتظر شمس العداله
يحزن الناظر على الساحه مثوله
وكنت عاشق تبكي القمرى دلاله
عاش في دنيا غريبه ومعزوله
بارقٍ يثني رفيفه في خِياله
لاسقى زرعه ولا ينعش هطوله
كم قليبٍ يسكن الثعبان جاله
وكم عزيزٍ ماورث الا ذلوله
كلها ماغيرت فجر وزواله
والجبل ماتجرحه.. مجرى سيوله
لين ردت بين ضحكات وجماله
ادفن اشواقي ولا ابيع الرجوله

غــ الخبرـريب