يوم طقتني الطقاقة.........الجزء الاول
 

السلام عليكم
هذي قصة وصلتني عبر الايميل من حواي سنة ولانها اعجبتني احتفظت فيها......انشالله تعجبكم انتو بعد
بس انصحكم بالنصائح التالية اولا[list=1][*]ضع الواقي من التوهج على الشاشة اولا[*]جيبلك عصير بردقان او قهوة وفصفص [/list=1]
ولاتنسون تحطون وسادة تحت رقبتكم
يالله بسم الله
كان يامكان في سالف العصر:D :D :D

لالا هذي القصة بسم الله

يوم طقتني الطقاقة ........
هذا ماحدث فعلا...... والله والله صدق من قال أن الطقاقات تطورا لحد ماتحصل كل وحده منهم ..هامتها فوق السحاب....
والغريب انهم دايم يجون ضايقة صدورهم ومكشرات ...والنفس على طرف الخشم .. طب ترا الاغاني يبيلها سعة صدر ونفس خفيفة من طاقك عشات تجين ...<= = = من جدها البنت ضايق صدرها....
تبدأ القصة يوم شرطت خالتي الله يهديها تجيب فرقة مشهوره عشان تطق بعرسها ..وتبيض وجها قدام أهل المعرس ...
قاموا الاهل واقنعوها ان مالة داعي تتعب نفسها وتتعب ميزانية رجلها وتجيب طقاقة بذيك الحسات( يعني بذاك السعر المبالغ فية) حيث ان اسعار الطقاقات يبيلها مهر ثاني ... وبصراحة وقفت معها انا وقلت لاعرس من دون طقاقة ,,
وشذا اجل محدب جايانا بيقولون ذا موب عرس ذا ماتم ...
قالوا لنا الرجاجيل ,, جيبوا لكم مسجل والعبوا لعب..محدب ماسككم..بس لاتجيبون طقاقة بذيك الحسات ماهيب طاقة الا ساعتين وماشية ولهافتن مكنم ذيك الغمطة(يعني غمطة ام خمس زرقاء...) ,,
قمت انا اطاق واصارخ قلت اجل مانيب عازمة صديقاتي ...وشذا عرس من دون طقاقة تشر المعازيم شر..(يعني ترقص البني رقص)...
المهم بعد طقاق عنيف....كنهم اقتنعوا وقالوا اجل كيفكم الدبره دبرتكم تكفلوا بكلش بس لاتقولون سلفونا ...قلنا لاماعليكم ازهلوها بنجيبها ومناب مستعينين فيكم ..
قام واحد من خوالي قال:موب بكره تجون تقولون لنا ودنا وجبنا لبيت الطقاقة ...ترا انا ماحب اتكلم مع ذا الالشكال ..تراهم ان زعلوا مسكوكم وفرشوكم ...
قلنا لاابد ماعليك بنصلح بس انتم مالك دخل...
المهم العروس انشغلت بتجهيز قشها ...وقمت انا برحلة البحث ..عن طقاقة مناسبة...لعرسنا وخصوصا ان حنا حجزنا القاعة واتفقنا على البوفية وسنعنا كلش...
بس بقى اربع شهور على الصيف..(وهذا الكلام بالصيف الماضي ..يعني تم لة سنة تقريبا...)
المهم قمت ادقدق على البني المشهورات بحب العروس ..(الله من كثرهم بعد) ...
قمت دقيت على وحده كانت تجلس معي بثالث ثانوي...(وذيك البنت من جد قصتها قصة ...لو اقصها عليكم ماصدقتوا ...خصوصا انها كانت طقاقة محترفة وعليها صوت يهبل ..والمدرسات يكلمونها ويقولون لها نبيك انتي وخواتك تجون تطقون بعرسنا ...ويعطونها والله درجات ..<= = = يخافون منها ..وفعلا كانت عماره شاهقة طول في عرض كنها ملعب كوره تنس< = = =( تعرف معنىملعب تنس يعني )..المهم كانت هالبنت تقولي ... انها تحب الطق والطقطقة وانها من كانت بزر وامها تسحبها بالعروس وانها كانت يوم صغيره تجهز لخواتها فساتين العروس وتحب تحفظ الاغاني ويوم اول ماطلعت احلام كان ودها تصير زيها وكانت تقول ان امها من زمان تعرف احلام يوم كانوا صغار... < = = = (تراني مدري صدزها من نصبها ..فلا تاخذون بكلامي همن تجيني احلام تقول مها مهيب فنانة العرب...ترا مابعد نسيت موقفي مع الطقاقات...بيجيكم الموقف بعد شوي)....
المهم بعد مانتهت امتحانات الثانوي انتهت علاقتي فيها يعني انا اصلا ماكنت اشوفها الا يوم الاثنين والثلاثاء(لاانها الاربعاء تكون مشغولة وتستعد
لعرس...وتجهز الطيران مع خواتها ويوم السبت ان جت الفصل بتكون تشخر على الطاولة عشانها مانمت لا خميس ولا جمعة تدوج من قاعة لقاعة....)...
المهم ..... اتصلت على الاستعلامات ..اتصلت على بنات ثنويتي...البنت انشقت الارض وبلعتها ...وانا ماعرف بيتها بس اني اعرف صوتها واعرف انة يقط الطير من السماء...المهم كان اسمها زينب ..بس في المدرسة كانت تلخ
(يعني تطق) اي احد يسميها زينب...(تقول نادوني أفنان ....) لاتستغربون لااني اذكر مره انها جابت امها ....وهي زعلانة ..تقول ان البنات يسموني زينب ..وهذا الموقف حدث فعلا...وبالعاده ..امها تجي كل سبت تجيب زينب عشانها تتاخر ...عن المدرسة ...لاانها ماتحب الدراسة بس..امها ..تبيها تكمل تعليمها (ياحسره تبيها تطلع دختوره الظاهر...ان الطقاقات ماكتفوا من فلوس الطقاقة ....يبون يصكون على الوظيفتين )...يالله تخيلوا مدرسة ودرس الطالبات الصباح وهي الليل تطق بالعروس
الله من الجيل الي بيتخرج ....بعد بيصير جيل يطق رقبة ....
< ===== قامت تنكت .... (اقول وين وصلنا للموضوع )...
ضعت والله
اية المهم ...دقيت على الاستعلامات ..قاموا قالوا لي عطينا اسم ابوها كامل ...المهم فركت كل قدراتي عشان اطلع اسمها من وحده من البنات كانت تقعد وراء من جنبها شعب الكسلاء الي يتسندون على الجدران.... المهم دقيت على البنت وعطتني الاسم ..كامل....
واتصلت على الاستعلامات وخذتة وجيتك طايره .....
طبعا اتصلت ...وردت علي سيلانيتهم ....قلت لها ان رجعت قولي لها مها ال فلان الي معك بالثانوي..اتصلت عليك وتبيك بموضوع عرس... < < = = = حلوه تبيك بموضوع عرس..
(وش اقول بعد) ....
المهم خالتي شبت علي وش سويتي وش سويتي..جبتي الرقم ...ولا لا ..معاد بقا على العرس شيء.......
قلت لها لايابنت الحلال كلش زين ...والأمن مستتب .... <= = = = ماتدرون وش بيجيها من الطق ذي....
المهم بعد 3 ايام من اللطع والتلحط تحت سماعة التلفون ...يدق التلفون و وتطمر اختي جعلها الي مانيب قايلة < = == = يتسابقون على التلفون ...
وقالت لي .....وحده تبيك ..اسمها أفنان ..قلت جاك الفرج ..واطير من الفرح ارض جو....
الو ... الو ..هلاوالله ..عاش من سمع هالصوت ....
افنان :ايوه أي خدمة ...
صوتها كنه صوت ( محمدالابراهيم(الوافي) اذا ماتعرفونه قولوا لي عشان ادق علية بيجر يعرفكم بنفسة ..خصوصا ان بيقدر اتصال البنات وبيجيكم ارض جو.. ان قام يسوي شيء مهم )..
مها : وش اخبارك يازينب ...
افنان :نعم ..اقول احترمي نفسك ..
من معي..
قلت لها :لااسفة امزح معك ..
افنان :ماعندي وقت بالله عليك خلصينا ..
طيب طيب
مها:والله عزيزتي افنان عندنا عرس بعد ثلاثة اشهر...نبيك تطقين بعرسنا ...
افنان:خوش والله ..3 اشهر بس.....طب تو الناس ...لا بعد نبيك تطقين في عرسنا ..تمونين يامدري وش اسمك ...
افنان :الناس يقولون نبيك تتحفينا بصوتك ..نبيك تشدين لنا ..نبيك تغنين ..أما نبيك تطقين بصراحة انتي مدري وش اقول....(يعني كلامي ماعجبها)
وسكتت ..
طبعا انا طق فيني عرق كل هذا عشاني قلت نبيك تطقين ..
المهم نفسي شانت ..(بس وش اسوي خالتي محتده ..وانا ناطة بحلق خوالي اني انا الي بتكفل).. فقررت انطل وجهي بالي هي بة
المهم قلت لها يعني مافية امكانية ...
افنان :والله شوفي اشهر الصيف...زحمة والحجز من رمضان ...
قاعده أقول في نفسي..(الله واكبر ..من رمضان يا افنان وشدعوه الناس تروكع وتهلل وانتي تسوين مواعيد ماعلينا... ..ضريبة الشهره )... (مالومك توك تفتكين من الثانوي وتوك تقومين سبت من دون امك ماتجيبك ..)
< = = = = هذي حقدها شين ان حقدت طلعت الاولي والتالي
قالت عطيني اليوم والتاريخ بالضبط واشوف وارد لك ..
قمت قلت لها ...(بس الله يعافيك ) < = = = = خفت منها ....
نبيك تستعجلين شوي ...
المهم أفنان على بال ماتطلع كلمة تقعد عشر دقايق عشان تطلع الثانية..
تبي تسوي ثقل .....
وانا قاعده اقول بنفسي...(ياريبية شكلها ماعرفتني ....نست اني كل سبت اساعدها وانقلها الواجبات لانها تكون هايتة بالعروس ...كنت رحوم والله اخاف من مدرسة الفيزياء..توقفها وخصوصا ان ذيك المدرسة مطوعة ومتسلطة عليها عشانها تطق بالفصل على الطاولات والكراسي وان مالقت شيء تطق علية طقت على السبووره ...وكنت اتعاطف معها ..بس كنها كفوا ...(وقعدت اقول وراني ماذكرها في نفسي يمكنها ناسية).......)..
المهم تشجعت وقلت اقول افنان تخبرين ايام الثانوي...(قالت تمونين والله )
وطربخ بسماعة.....طوط وطوط وطوووووووط..
(وش خلاني بس اسئلها ذا السؤال..وش لقفني بس ) كنها كفوا < = = = ماعندها غير ذا الكلمة عشان تواسي خشتها الي طاحت ....
المهم ...قعدت طبعا ادور على المشاغل والخياطات ...وادور لي فستان ...
كان ودي افصل بس خلاص ..معاد عندي وقت ...مشغولة مع خالتي بترتيبات العرس..
ومن الرياض للدمام ومن المدما للرياض كلة عشان ذا العرس...
وابوي يقول تراكم يابنياتي بتتحسوفن كلها ساعتين ..همن...بتصفطون الفساتين بالدواليب
المهم ذا ك اليوم ...جاء عريسنا يشوف مرتة ...ويسلم عليها ..قالها يابنت الحلال ...خلينا نسافر واجلي ذا العرس لبعد السفر وان رجعتي سويها حفلة ...المهم خالتي دخلت السالفة بمزاجها طبعا وش عليها هي العروس ..ماهيب راقصة ولا شيء..بترتز على ذا المنصة ..همن بتخلع لبتها ونقعد بها حنا نصب شاهي وقهوه
بس انا وخواتي وبنات خالتي الضعيفات نبي عرس نبي رقص...
هي بتطس وحنا بنقعد نصيح بذا الفساتين الي تكلفنا فيها ...كل فستان بذيك الحتسات ...
المهم ...قالت لة ابرد عليك واشوف و افكر....
المهم اتصل بعد يومين...يشوف وش قررت .._(عشان يحجز متى ويسافرون )
ومن الصدف اني اكون جنبها ...وكل ماقالت شيء نغزتها قلت لا قولي لا ....
وهي مسيكينة احتارت تسوي عرس ولا تهج وتخلي الدنيا تواسى ...
وانا ويا خواتي سهمتنا ...نغز خالتي وقرص وعض وهي تسولف..لين استاذنت منة ...وهي صايلة علينا ..وش تبون ..خلاص ضيقتوا صدري...
وكلنا بصوت واحد ....نبي عرررررررررررررس
نبي نررررررررررررررقص..
نبي نعزم صديقاتناااااااااااااااااااااااااا..
ماتحسين فينا انتي.... المهم الحرمة استسلمت ..وقالت اجل اعتمد عليكم خلاص عرس عرس...
(طبعا افنان العمة مابعد دقت) ..
وبعد عناء طويل..خذت السماعة وبنفخ طلبت افنان .....الو افنان موجوده
ايوه لحظة ...
ردت اختها..افنان في البركة ....(الله واكبر..وصار عندكم بركة بعد ..الله من الخريط بعد ...)
قول لها ماردت علينا بخصوص موضوع انها تغني بعرسنا ...(وجيت بقول تطق...وخفت يجيني واحد طوووووووط)
قالت والله ماعتقد ...حنا محجوزين بذاك اليوم ..
المهم ....قلت كان قلتوا لنا ..مايصير كذا ...عيب ... حنا ورانا ارتباطات ...
وبعدين حنا موب بحاجتكم ...يالله الف من يتمنانا,...ويحضر عرسنا ..مع السلالامة
(قهر سكرت السماعة قبلي ...كان ودي اخبط السماعة قبلها ...المهم بعدين اوريك ياافنانوه) وانا قلبي ينتفض ..من القهر....
الا اختي تسمعني.....اجل تقولين يامها الف من يتمنا يحضر عرسنا يالله اقعدي بها .. خلينا نشوف يوم مابقى الا شهرين ..احد بيوافق ...
ياحوووووووول يارب....
والحل......
المهم ...استعنت بالله ...ورجعت ادقدق على بيوت الربع ...وكل وحده تمدح لي فلانة وتعيب على فلانة وانا ادوج بينهم ...من اختار بس
المهم واجمع لي 4 ارقام او حول خمسة ...الي من الرياض والي من الشرقية والي من جده ...
المهم وحده اعتذرت قالت ابي ثلاثين الف ..وسكرت قبل ماتسكر في وجهي ..لاتسمع شهقتي همن يغى عليها ...
المهم ..وادق على طقاقة ....دوسرية .....بس صوت مهوب صاحي < = = =على مدح البنات .....
الو..ام بندر موجوده ..
ايوه معك .. < = = =( الله من الفقر ماعندها سكرتيره زي افنان )(متعقده )
ايوه حياك الله ...
انا:والله الحاصل كذا وكذا ...وانا سمعت عن صوتك انتي واختك ....واتمنى انكم تشرفونا < - - - - - - - - صرت ذربة ....واعرف احتسي خفت بعد اغلط همن اروح لطوووووووووط....
قالت ابد تم ..قلت الله يبشرك بلخير..(وماقدرت امسك نفسي ..بعد عناء طويل اخيرا,,,,كني طايحة من السماء)
قالت بس ابوصف لك البيت < == = = == لا والله شكلها هي الي طايحة علينا ...شكل محد طلبها من سنة ...(ماعلينا اهم شيء توافق...وبس...)
طيب قلت عطيني الوصف ..
قالت :البيت صعب عليك يامي ..ابجيك في السوق الفلاني..ونتفق على كلش.......................................

انتظروا الجزء الثاني:D :D