منتديات الـــود - خبر عاجل.....دحيم والأمريكان

خبر عاجل.. دحيم والامريكان!

السلام عليكم ورحمة الله وبركاته:

باض الديتس وزهم علينا دحيم وحنا قد رحنا نعّزي أبوه وأهله نحسبه مات خبرنا به حظه شين وهاقين انه إن قعد في مكان يبي يدبج عليه صاروخ كروز والا يبي يتناثر شحمه ومصرانه من قنبله انشطاريه وأثره مدّهر فيذاك في برّان العراق وشعبانها هو وددسنه ذا اللي ما يعوق معه شي .. وما تلقاه الا في قلب الحدث من زود البثاره. وما نوحي حوله إلا دبج صواريخ و شيّ(ن) يروّع. وقبله جنب الامريكيين موذيهم وناشب(ن) في حلوقهم حول ما يوطـّي أصابع رجليهم إلا مشى معهم وان بغى علم(ن) من حقين العراق يركب هالددسن شير طلوى مدري طير شلوى ويدرعم لبغداد يلقط أطرف علم ويجي ناكس صافقن طبلونه لو تشوفه تقول ذا رايحن يجربع موب يمّ سنع..

والاداره تعلن لكم الآن انها ستنقل بثاً حياً ومباشرا (ولايفاً) لكل ما شافه دحيم فيذاك يوم زهم علينا وكب العلم مرة(ن) وحده تسنه حرمتن توها جايتن من عرس ..

البـــث المبـــاشر من قلب الحدث ... ساحة المعركه تتكلم !!

يقول الدحمي: يوم عقبتكم ذاك اليوم وفصل الخط بيني وبينكم وضوى الليل عليّ وانا اللي أنصى لي شجرة طلح قلت أبتليّن حدرها ومن اصبح أفلح <--- موب عاقل راعي الصباح الباكر..

يوم غطيّت في النوم وحاطن رآسي حدر الكنداسه يقالكم ذيب عشان النامس ما يدل رآسي خبركم عاد بلاني ناعم وما ودي تخرب خدودي ويغدي فيهن بقع.. وانا اللي اصبح على صوت هالجنازير من يمين يسار من كثرهن وانا اللي ارتاع واطمر كني مقروص ونسيت اني حدر الكنداسه وتنشب جبهتي بين السسته والهوب لآآآبوها من جبهة(ن) وش كبرها عجزت افكّها وجزاه الله خير الضابط ديفيد يوم يلبّق دبابته وجا يمّي يبي يشوف وش هاللي رجليه يتحقرصن ويكافخن ورآسه غايصن من داخل .. ويزعق زعقة(ن) وحده وكلها دقيقه واثر جنود واشنطن كلهم عندي ويتشاقلون الددسن وينفضونه الين انفك رآسي نعنبوها امريكا ما يعوق معها شي ..<---- سواليف قراوى ..

وحسبتهم حبيبين وعلى نيّاتهم يوم يفزعون واثرهم من يوم ما جدعوا رآسي وهم حاطين بنادقهم في تسلاي وانا ما خفت ابد بس اني بلعت ريقي ثمنطعشر مره .. قال واحد(ن) منهم احمر(ن) أعطر لو تشوف وجهه تسنك شايفن لك شلخة جح نص استوى يقاله الادميرال بيتر أندرسون. قال وش انت من لحيه..؟! ووش جابك فيذا..؟ قلت انا جاي(ن) ادوّر الربيع ومعي شوزن أصيّد فقع <--- اختبص من الذراقه..

قال اخس واقطع وعوّد وراك ان تسان امك تبيك .. قلت سم ومثلك يآمر الله يلعن امك <--- اختبص من جد..

شغلت ددسني ويعنني قاعد احمّي يقالك مسوي ذيب وانا بس احتريهم يمشون وبامشي وراهم عناد(ن) فيهم ومهنا الا تلحيم بدباباتهم الصدام بالصدام ولو ربط فرامل قبعت فيه عشان ما يشوفونّي بالمرايات اللي على جنب .. بدوا يمشون ومشيت وراهم ويمشون وامشي وطقت تسبدي منهم تسنهم شيّاب ما يمشون الا اربعين وقامت رجلي تحكّني تسن فيني غرغرينا وانا اللي اخرّبها لعيوووون المساطيل واتساقط انا وايا واحدن منهم وحدّيته على جال شعيب وشقص فيه واصقط عليه وادق له فليشر مرتين يعني لا تتحدى يا زلابه وأدزه بالثالث ومحطت المكينه محط واستلمتهم تشطيف بالدور دبابه ورى دبابه من زود الحقران و عقبتهم كلهم وما تشوف الا غبرات وعجعجه وراي وبغيت آطى ثلاثة منهم مدري وش بلاهم محولين من الدبابات الظاهر محد قالهم ان دحيم بيمرّ من هالدرب وقعدوا يشجعّوني يحسبوني أفحط بس ما عطيتهم وجه .

وعقبها ما غير اطوي الارض ناحرن(ن) البصره و خاش(ن) جو مع عبدالحليم عبدالقادر وما لفت انتباهي( منتب عاقل) الا صوت جغجغه وطقطقه تحت الموتر قلت بس ..هذي جبهتي عفطت لها عمود الكردان والا شقّت الكنداسه ... يوم وقفت وانا اوحي صوت ونين قلت ليّاه قطو(ن) ساحبه معي من السويدي. ويوم طليّت واثره وكيل رقيب أمريكي رافع رآسه يطل من خندق وأنا اللي ألقطه مع خنافره وأجرّه معي بالموتر واطامر به مطامرن موب صاحي ووالله لو انه آدمي تسان مات <---- ما ملا عينه هالامريكي .

واجيب عصا العفريته من ورى المرتبه واخليها تشقص في خنافر خشمه وادقمه دقم لين انفكت خشته من كنداسة موتري .. والعطه يالدحمي !

وجا تعميم من بوش بكبره قال اصبروا يالربع.. الحرب لاحقين عليها ما حولكم مجلس امن ولا حولكم احدِ يبي يعترض. متى ما بغينا نضرب ضربنا ... بس تكفون قولوا لحقين المشاة يزبنون ولعد يتحركون لا ياطاهم الدحمي تراه عليمي ومهنا شوف ومحنب ناقصين تجون من الحرب متكسرتن ضلوعكم حدر ددسنه ...

ودخلت البصره ولبقت ددسني عند عاير مسجد وعلّمت العراقيين ان امريكا جايه فالدرب قالوا دارين قلت طيب .. قلت لا بس حبيت أعلمكم قالوا يآخي قلنا لك دارين توكّل بس .. وترانا الحين كلنا قاعدين نحتري وش بيصير ووش موب صاير ( الله من زين الاسلوب ) وبوبزت معهم احتري الجنب يوصلون ما ناقصنا الا مداخن ودلال ونقهويهم ثم نلعن جدفهم ..

وان تساني من الحيين دقيت عليكم وعلمتكم وش صار وان تساني من الميتين بدق بس منيب معلمكم وش صار ...

هاذي كانت اخر كلمات مراسلنا ونبي نوافيكم باخر المستجدات ان تسانه اتصل علينا

المسكين مايدري انهم قضوا على العراق

وسلامتكــــــــــــــــــــم

ملطوووووووووووووووووووش

وفالي وفالكم طيب