قالت في عيونك اشوف براءة طفل
وفي هيبتك ياعمري شموخ الرجال

وكلك على بعضك كذا مضرب مثل
ياسعد منهو رافقك يابن الحــــــــلال

الوفاء والحب بقلبــك له محـــــــل
والطيب والصــدق مكملٍ للجمــــــال

ان تكلمت حكيك يمليه العقــــــــل
وان سكت يكفيك قديمــــات الافعال

العطــاء واضحٍ منك مامن بخـــل
يشهــــد على ربٍ عظيـــــمٍ في الجلال

طلتك بعيني اشوف كل الثقــــــل
ومن ضحكتك الفرح بداخلي له مجـــال

قلت العفو يابنت لاتزيدي بالجدل
ولاتجاملي شخصٍ خاطرك له ماستمال

يكفيني الوصف ماجاني والجمل
ويكفيني من الزمن لوعـــه وغربـــــال

قالت نسيت اذكر تواضعك والخجل
ونسيت طبعك يافارس الحلم والخيال

قلت اسمحيلي بجمله ولاتظنيها غزل
ودي اوصفك وداري انه هذا محال

كيف اوصفك ومالك شبيه ولا مثــــل
متربعٍ وحدك على عرش الحسن ودلال

خدٍِ وقـــدٍ ولســــــــــــانٍ به العســل
وعين لارمشة تنضرب بيها الامثــــــال

وجسمٍ لاانثـــــنى على ساقٍ ورجل
يفتن الناظر وعقله يصيبه خبــــــــــال

وانتهى شعري ووصفه لسى ما اكتمل
وانقضى وقتي مابين قالت وقـــال