منتديات الـــود - وقلبي اللي بين الاضلاع جالا

هذه القصيده المؤثره قالها موسى عمران الرشيدي

وقلبي اللي بين الاضلاع جالا=جولة نعامٍ جال عقب المقيلي
جال وتذيّر واعتلاه الجفالاَ=واقفا مع اوساع الفيافي جفيلي
ولجت اضلوعي مثل لج المحالا=على السواني فوق عدٍّ طويلي
عليه سلفان القبايل تتالا=تواردوا من كل صوبٍ نزيلي
تعاقبن فوق المحال الحبالا=تارد وتصدر كل دلوٍ ثقيلي
ميرادها جمٍّ قراحٍ زلالا=ومصدارها تصدرعلى ظهور حيلي
لج المحال ولج صوت العيالا=ولجت حنين الخلج معهم تهيلي
مثله يلجّن الضلوع النحالا=والجسم من ماصاب حالي نحيلي
على وليفٍ عن حوالي يسالا=وانا على فرقاه مقفٍ رحيلي
عنهم مغيب الشمس سقت الرحالا=واقفيت عن لاما العفيف الجميلي
ايّست من لاما حسين الجمالا=طويت ياسي والرجا مستحيلي
من مطلبٍ لاهله قطعت الجدالا=مطلب ويكفي عن كثير وقليلي
النفس للمطلب تحب وتحالا=الاّ فراق الشمل مايستويلي
انارجل ممشاي ممشا الرجالا=امشي بعزي والمعزة دليلي
لوإن قلبي للمحبين مالا=مع كل طاري يم خله يميلي
يطري على قلبي مليح الخيالا=ارعى خياله في نهاري وليلي
ارعى خياله مثل راع الحلالا=واحن حنين الخلج واعول عويلي
واخايله مثل العرب للخيالا=وعيني على وجهت خياله تخيلي
خيال حيٍّ دونه الياس حالا=فرقاه ضرتني بحالي وحيلي
في مامضا رجواه فيها مجالا=واليوم ماباالياس قولٍ وقيلي
رجواه صارت مثل فيّ الظلالا=في وسط بستانٍ ظلاله ظليلي
مالت غصونه مع نسيم الشمالا=باثمار طلعٍ مالوصفه مثيلي
يوم استوى بفروع فيّ الجبالا=صافٍ هواه وماه نبعٍ يسيلي
ظلّل عليّ بظل فيّه وزالا=من غير شوفه ماحصلّي حصيلي
واطلب من اللي في جلاله تعالا=يجبر عزاي وللمحبه يزيلي
ويعوضني معط العطايا الجزالا=هو اللذي بارزاق خلقه كفيلي

هذه القصيده اعلاه التي اثارت مشاعر عدد من الشعراء وجاراها على نفس الطاروق كلاً من الشاعر جزاء صالح الحربي حيث قال

موسى عشير الطيبين الرجالا=اهل المواقف ناطحين الدبيلي
هيض غرامي بالبيوت الجزالا=وانا رقيق الحال مالي مثيلي
لو كان ماوجه علي السوالا=ولاوجه القاف الثمين الجزيلي

والشاعر نشاء فيحان الشمري حيث قال

ياموسى بن عمران جالي مجالا=ابعترض لو كنت ماتشتكيلي

والشاعر جلعود لافي الهمزاني حيث قال

بني رشيد مطوعين الزعالا=يوم اللقاء يشفون قلب الغليلي

والشاعر حمدي عبدالله الخياري الرشيدي ولا يحضرني رده