والله إني مانويت أبدي معاها بالخطية = بس هي اللي تعدت لحظة غضبها
يوم ثارت في جنون من جنون الجاهلية = عاتبتني لين شبت في شراييني لهبها
وأستفزتني وفزت وزعلت مني عليه = وأستضاقت من كلامي يوم زعلني عتبها
من بعدها مابقالي في محانيها بقية = أسدلت دمع المحاجر للبكا وأرخت هدبها
والله أني كنت أكابر بالعتاب بحسن نية = بس أبدري هو صحيح إني الوحيد الي عجبها
جرحتني بالكلام وكبرت حيل القضيه = وأخسرت بي كل عرق من شراييني كسبها
ولاهي ماكان فيها للموادع مقدرية = والجفا كانت تعافة بس مدري وش قلبها
ليتني مارحت أقايس قيمتي عند بدوية = رجعت لي كل عرق حبها ولا نهبها
علمتني كيف أبجفا وأنتصر وأبقى ضحية = وعلمتني كيف قلببي لو غلبها ماغلبها
وعلمتني يوم صدت عنفوان الأجودية = ماتلوح للمقفى لوسلبها ماسلبها
رابية بين القبايل والعرب وأهل الحميه = عاقلة ماتبذر إلا نخلة تعرف رطبها
إن تهادت ذكرتني في خفوق العامرية = وإن تمادت تركب إبليس الرجيم وماركبها
إن حكت تعطي مكانة للحروف الأبجدية = كن كلمتها تلفت للكلام اللي عقبها
والحروف الليا تعدت بالشفاه النرجسه = كنها صارت قصيدة بس ربي ماكتبها
وش أوصف من حلاها وش بخلي للبرية = مابها بالحسن عيب وإكشفته إلا حجبها
كل شي شفت فيها فيه نبرة جاذبيه = موهبه من فضل ربي وأشهد إن الله وهبها
كلها لله بالله فاتنه هالأدميه = عاجبتني من بداية راسها لأسفل كعبها
لو تبادلني شعوري والهديه بالهديه = ماوفت لي لو تبيع ثيابها وأغلى ذهبها
هملتني والقلوب الجر هديه جر هديه = وأحرمتني والمحبه نارها تاكل حطبها
ولا أنا ماكنت أكابر والليالي سر مديه = يمكن اللي غصبني للولع فيها غصبها
ياخفوقي وأدري أنك منت بحاجة وصيه = شفت مكاني وأنت تدري وينها يمة عربها
رح لها وإن كان فيها قلب يطمح في مجيه = شف طلبها في عروقه وإن حصل تم طلبها
وإنشده وإن قال عنها من هدر دمي بريه = قل له إن اللي حصل لي بالحبه من سببها
ولو يقول إني تعمدت الخطا لأجل الأذيه = قل له إني ماتحمل بالعتب قلة أدبها
ولو يقول إني أنا اللي كنت بادي بالخطيه = قل هي اللي تعدت حدها لحظة غضبها