منتديات الـــود - يا حبني لتس يا جدتي

:biggrin:السلام عليكم

يسعد صباحكم إن كان صباح ويسعد مساءكم إن كان مساء

كتبت قصة فكاهية إن شاء الله تعجبكم .. وهي من تأليفي ..

كثير في حياتنا سمعنا عجايز يقولون إحنا وإنتوا والمقارنات إلي لها أول مالها تالي ..

وموضوي يحمل نفس الفكرة .. وما بطول عليكم ..

بس بقى أقول لكم شي .. التعليق إلي بين قوسين .. تعليقي على هلوسة العجوز ..

هلوسة إحدى العجايز :

تذكرت ليالي .. كنت أنا فيها الأجمل .. كنت أقط الطير من السما .. آآآآآآه ياليالي العمر .. ليالي كنت أبهر .. أبهر رجال تزوجني .. وصار حليلي .. ومر علينا زمان وصرنا كبار .. لا لا .. هو صار كبير .. أما أنا بعدني صغيرة .. وأقط الطير من السما .. ( بدينا )

ولا قمت ومشيت وتمايلت يمين ويسار ( قصدها تعرج ) يقولون بسم الله عليج ( خيفين عليها تطيح ) ولا ضحكت اصفنوا ( مفجوعين طبعا ) ولا تضايقت وقلت أف هبوا يراضوني ( خايفين لا يرتفع عليها السكر والضغط )

( تسكت العجوز شوي وترجع بذاكرتها للوراء ...... وتقول )

إيــــــــــــــــــــــــــــــــه يا ذيك الليالي .. كنت أمشط شعري بمشط القمل .. وأدهنه بالزيت لـــــــــــــــــــين يقطر .. وكنت أقبص خدودي لــــــــــــــــــــــــــــــين تحمر .. وأعض شفايفي لــــــــــــــــــــــــــين تصير مثل شفايف منسي عقرب ( نانسي عجرم ) .. وأكحل عيوني مثل كيلو بقرة ( كيلوباترا ) .. وأحني أطراف أصابعي والشعر .. وأنثر العطر على ثوبي نثر .. وأتبخر بالبخور الزين ..

وألبس ثوبي الأزرق .. وأحط الطرحة الخضرة .. وألبس نعالي الأحمر ( وإنتوا بكرامة ) .. وأتزين بالذهب .. (كملت علبة الوان:biggrin:)

إلي يشوفني من بعيد يقول سينديريلا العرب .. وإلي يقرب مني شوي يقول ................ قمر ( في حالة الخسوف )

حنا يا بنات أول .. شعورنا حلوة طويـــــلة وســـــــــــــودة و غزيــــــــــــرة ونــــــــــــاعمة ( ناعمة ؟ أشك ) .. أما بنات هاليومين ينافسون العجايز بلون الشعر يصبغون شعورهم باللون البرتقالي والأبيض والأحمر ويقولون اسمه عيش ( ميش .. high light ) .. ويقصصون شعورهم وينتفونه .. ويحرقونه بششوار ( يستشورون شعورهم ) ..:biggrin:

لا .. ولا ضروسهم اللهم يا كافي .. مرصوص عليها الحديد ويقولون هذي الموضة ( التقويم .. clandur ) .. ولا بنات أول الحلوة فيهم تتميز بسن الذهب .. لا ضحكت تشوف السن يبرق .. ( سبحان الله )

وحنا لو دخلنا المطبخ .. طبخنا المكابيس .. والهريس .. والجريش .. حتى المندي نسويه .. أما هالبنات يعرفون يطبخون البرقع ( هام برقر .. humburger ) والبسة ( البيتزا .. pizza ) والقناقن ( نقانق .. hot dog ) .. والله يهديهم يطبخون طبخة كلاب ( كلاب ساندويج .. club sandwish ) ...

وياكلون منها ويقولون بنسوي ريجيم ...

<--------------------------------- >

تـــــــــــــــــــــــــــــــوت انقطع الإرسال

وبعد ساعات طويــــــــلة .. عاد الإرسال

ومرة في يوم من الأيام قلت خليني أروح عرس فلان وأناظر هالبنات وأخطب لآخر عيالي وأزوجه وأفرح فيه .. بس وين ألقى وحدة جميلة تقط الطير من السما مثلي ؟ ( ردينا ؟)

( راحت العرس .. ويا ريتها ما راحت )

يوم دخلت وشفت البنات .. قلت مساكين هالبنات من إلي يضربهم ؟! ( مستنكرة الوضع لا بنت ولا بنتين كل البنات مضروبات ؟ )

الخدود حمرة من إلي مصفعهم .. ( بلاشر .. blusher ) .. لا .. ولا العيون يا حرام من إلي مبكسهم .. ( أي شادو .. eye shadow ) .. ويوم رحت أسأل .. ضحكوا علي وقالولي هذا بيكاب .. ( ميك أب .. make up ) .. قلت وش إلي مخليكم تتسدحون تحت البيكاب .. هذي سيارة ثقيلة زين ما كسرت خشومكم .. المشكله أنهم ضحكوا علي مرة ثانية .. ( مستنكرة الوضع للمرة الثانية )

ويوم رديت البيت وقلت يا عبد الله ( أصغر عيالها ) لقيت لك بنت الحلال .. قاطعني وقال : آسف يالوالدة .. أنا أحب وباخذ إلي أحبها ..

والله أن الزمان غير الزمان .. كل شي فيه تغير .. وصار كبير السن فيها غريب ( أها اعترفت وبالغلط أنها كبيرة في السن )

[Bوأخيرا انتهت هلوستها .. وهذي هلوست يوم واحد بس .. ..

المهم : أنا كان قصدي من الموضوع هذا الفكاهه فقط .. وما كان قصدي أقلل من شأن كبار السن .. وهم على العين والراس ..

تحياتي
بنت الششوووووووق :biggrin: