برائـــة القــراوى البسيطيــــــن
 

بسم الله الرحمن الرحيم

ترى القصه شوي طويله اللي يبي يوسع صدره يقراها


ابو داحم : بكره السفر بكره .. بكره السفر ترررمرم تررمرم

ام داحم : وش عند شايبنا مستخف الليله عسا ماشر

ابو داحم : ماودك نزور فرنسا

ام داحم : شكل الكبسه واللبن ضاغطين عليك الليله ورا ماتنام احسن لك

ابو داحم : داحم سعيدان عليان حصييصه وضحى تعالو ياعيال ابيكم

- وش السالفه وراك تصارخ يبه

- جهزو شنطكم ياعيال بكره مسافرين

سعيدان : تكفى يبه طلبتك مابي اروح عند جدي يقومنا من الفجر

حصيصه : وانا بعد يبه مابي اروح عمتي بس تخليني اسوي لها قرصان


ابو داحم : عيال فقر ياعيالي اقوول قوم انت واياها جهزو شنطكم حنا رايحين لفرنسا

(( حالة صمت وذهول ))

- فرنسا فرنسا
- لالا يبه انت تكذب علينا حنا بروح لفرنسا فرنسا اللي بافريقيا
- ايه فرنسا فرنسا ماودكم تكشخون يله بعد من 1 ل 10 مابي اشوف احد قدامي

طيراااااااااان كل واحد بغرفته ...

حصيصه واختها يرتبون الشنط ..
- اقوول حصيصه اخذ أي برقع ذا والا ذا
- ياجعلتس بالعافيه خووذيهم كلهم خل نكشخ وانا وخيتك كم مره بنسافر حنا






داحم وسعيدان وعليان بغرفتهم ..- يبه يبه وشلون جوهم هناك برد والا حر ؟
- والله ياوليدي يقولون انه برد يدخل العظم
- ياساتر يعني نشيل فرونا
- ايه ايه خذوها كلها ولاتنسون شي ترا يقولون سوقهم نار


ام داحم ..

- يابو داحم وش ناخذ غير البن والرز والدقيق ..
- لاتتعبين نفسك يمدحون كبستهم ومرقوقهم هناك ..
بس لاتنسين دلة القهوه ..





في المطار..

حصيصه : ياحظنا بنساافر
وضحى : اقول حصيصه اقرصيني خليني اتاكد اني ماحلم
حصيصه : وصلنا وصلنا المطار وناااسه
ام داحم : تمسكو بعباتي يابنات لاحد يضيع

عليان : الله الله وش ذااا ! كل ذا مطااار!!
سعيدان : يبه وين يحطون الطيارات فيه
ابو داحم : بنلاقيها بحوش المطار ياوليدي

حصيصه : يبه كلهم ذول بيروحون معنا فرنسا
داحم : يوه على بالي بس حنا اللي بروح خساره
ابو داحم : لايكثر انت واياه وامشوا نسال وش السواة الحين

حصيصه : يازينه زيناه
وضحى : منهو ذا ووينه ابي اشوفه
حصيصه : ياويل قلبي ويلاه
وضحى : ياجعلتس بالماحي وينه ذا
حصيصه : تعالي معي بس لايشوفونك عيال قريح

حصيصه : اكصكيوزمي
وضحى : الله تعرفين عنقليزي من ورانا
حصيصه تدوس رجل وضحى اسكتي مو وقتك الحين ,,
حصيصه : بغيت اسالك انت بتروح معنا لفغنسا
الاخ الكريم : نعم اختي ماسمعتك
حصيصه : لبى قليبك والله .. اقول بتروح لفغنسا معنا !
الاخ الكريم : فغنسا !! للاسف لا . أي خدمه ,,
حصيصه : يسلم قلبك
وتسحب وضحى حصيصه فشلتنيا امشي بسس ..
ابو داحم يحجز مقاعد وكل واحد من العيال يكتب اسمه على شنطته



في الطياره ..
ابو داحم : وراك يام داحم متمسكه بدلتك
ام داحم : اخاف احد يسرقها منا والا منا وهي راس مالي
ابو داحم : حطيها جنبك وانتبهي لها ..

بعد ماستقرت العايله وكل واحد جلس بمكانه وربطوا الاحزمه

واحد يبربر عليهم بالعنقليزي
حصيصه : يبه وش يبي صاحب الطياره وش يقول !!
ابوداحم: هذا الله يسلمكم يقوول الله يحيكم على طيارتنا واعتبروها مثل بيتكم حنا بنقلع بعد دقايق معدوده ولااحد يقوم من مكانه والله الله الشباابيك لاتنفتح مانبي ضحايا ..
سعيدان : ليه يبه مانفتح الشبابيك ودي اطلع راسي واشوف السما
داحم : أي والله يبه تكفى نبي نفتح الشبابيك ..
ابو داحم : الشرهه علي انا اللي ركبتكم طياره

وقت الاقلاع ,,
ام داحم : اشهد ان لا اله الا الله
وضحى : يازين الارض زيناه
سعيدان : يبه وراه مسرع قله بشوويش
حصيصه : أي والله مايقولون (( في العجلة الندامه وفي التاني السلامه ))
ابو داحم : الحمدالله على نعمة العقل ..

بعد الاقلاع بدقايق..
عليان : يبه ليه حنا جالسين ورا وذوليك قدام
ابو داحم : كله واحد اللي بيجيهم بيجينا اهم شي نوصل بالسلامه
عليان : لا بس يعني ياحظهم
حصيصه : ليه ياحظهم
عليان : بيوصلون قبلنا
حصيصه : بهذي معك حق

داحم: يبه متى بنوصل
ابو داحم : يامن شرا له من حلاله عله

حصيصه : يبه جوعانه ابي اشتري اكل
عليان : لا لا سمعت انهم يوزعون الاكل ببلاش
وضحى: ببلاش ببلاش يعني مانعطيهم فلوس
عليان : مدري يقولون

وبعد ماجابو الاكل وكلوا ببلاش حطوا راسهم ونامو

وضحى : حصيصه حصيصه قومي شووفي
حصيصه : وششش ماتشوفيني نايمه وراك مانمتي انتي وش مقعدك
- اما انام وانا بروح فرنسا قومي بس شوفي ذيك فصخت عباتها
- ياويلي ويلاه وينها فيه . أي والله صدق بنات مايستحون
- يووه شوفي ذيك بعد
- وراهم البنات انهبلوا
- حصيصه حصيصه ماكانه ذاك المزيون اللي بالمطار
- أي والله ويقوول مابيروح لفغنسا هين يابو صعروره والله ماتركك وراك وراك

جتهم المضيفه تسالهم وش يبون يشربون طبعا تشرشحت من وضحى وحصيصه ماقصروا معها
بعدين ابو داحم فهمهم وش سالفتها ..
الاخت حصيصه تبي بيرا هي واختها
ابو داحم : ياجعلك بالعافيه انتي واياها وش بيرته ..بيرتهم مو مثل بيرتنا
اقول اكصيوزمي جيبي لهم واطر وبس
حصيصه : لا لا خلاص نبي سن طوب مابي واطر

قبل الوصول ,,
حصيصه ووضحى سووا سواة البنات وشالوا العبايات بس براقعهم ماشالوها سنعات


في مطار فرنسا .. وقت التفتيش ..
طراخ وطيخ باغراضهم وحووسه وعفسه وفجاه من غير سابق انذار هجوم فرنسي
وش السالفه مايدرون الا هم بغرفه ظلمه واغراضهم في كل جهه حوليهم
مرت ساعه ساعتين ثلاث اربعه خمممممممس ..

داحم: وش السالفه يبه ..
ابو داحم : علمي علمك ياوليدي .. !!

حصيصه : يبه متى نرجع لديرتنا .؟
وضحى : يازين السعوديه بس ..

جا الافراج ابو داحم راح يشوف شالسالفه ..

ابو داحم : وين حاطه دقيقك فيه
ام داحم : مع عفشي ..
ابو داحم : يحسبونه شي ثاني الله يغربل عدوك
بس علمتهم وشو له ذا الدقيق اقولهم مركوك مركوك ( مرقوق )

بعد ماتكدوا وحللو الدقيق اكتشفوا انه دقيق .. اكتشاف عظيم يعني ..


في فرنسا ..
ابو داحم :يازين ديرتهم يام داحم .. ماودك نهاجر لها
ام داحم : مابقى الا هي اجي لبلاد الكفار واترك بلادنا
داحم : أي والله يبه مانبي نهاجر الله يخلي لنا سعوديتنا امن وامان
وضحى : بس يعني يبه كل سنه نزور فغنسا وش قلت ؟
حصيصه : وراكم مستعجلين وبعد ماشفتوا ديرتهم
ابو داحم : سرينا ندور سياره تودينا الفندق



في الفندق ..
ام داحم : ياساتر يابو داحم وين رايحين فيه أي دور
ابو داحم : يقولون الدور 30
حصيصه : الله يعينا على عليان
سعيدان : اقول عليان ترانا في فرنسا مانبي فضايح
وضحى : يبه وش رايك نربط ولدك وهو نايم
عليان :يعني لاني امشي وانا نايم تطنزون علي انا اوريكم ان مانطيت من الشباك وفشلتكم
داحم : وصلنا وصلنا يله

في الغرفه :
ام داحم : يازينها ذي الغرفه
وضحى : يبه ابي مثلها
ابو داحم : كلن على همه سرى
داحم : اقووول يبه جوعاااان ابي اكل
حصيصه : انا لها انا لها
ابو داحم : وراك يابنت وشو اللي انتي لها !
حصيصه : انا اسوي لكم ذاك المركووك اللي تاكلون اصابعكم وراه
سعيدان : يبه طلبتك تكفى مانبي مركوك بنتك
ابو داحم : يله سرينا ندور لنا مطعم قريب



في طريقهم وهم يدورون مطعم ..

حصيصه : يازينه زيناه
وضحى : وش شايفه بعد يامال اللي
- شوفي ذاك الاخضراني يازينه
- اخضراني !! ياكثر اللي يعجبونك صدق مو شايفه خير
- تعالي نروح له
- صدق اني خبله كل ماقلتي تعالي انا وراك ..
- هلااو هلاوو ياأخ
الاخضراني حالة صمت ..
وضحى : يازينه ذا المؤدب
- تصدقين وضحى ذا مايتحرك شكله زينه
الاخضراني : بنجوور
وضحى : ياجعلك بالعما ياحصيصه تحبين توهقينا سرينا قبل مايشوفونا عيال قريح







في المطعم ..

سعيدان : يبه وش ذا مافهمت شي
وضحى : ابي بطاط وواحد كبسه وزياده فلفل
حصيصه : وانا مثلك من زمان ماكلنا شي خفيف
ابو داحم : الشرهه علي انا والله
ام داحم : سعيدان ياوليدي الله يهداك غض بصرك
وضحى : افا ياللي ماتستحي تناظر في بنات الكفار
سعيدان مازال متنح
حصيصه : والله والله لو ماشلت عينك عن البنت لاناظر ذاك المزيون اللي جالس هناك ولابس جينز وتي شيرت وموقف شعره كانه ديك وعيونه خضر
<<< كل ذا وبعد ماناظرته يعني
سعيدان : لاحول ولاقوة الا بالله
ام داحم : عسا ماشر ايش فيك
سعيدان : مسكينه ذيك الحرمه
ام داحم : ؟؟
سعيدان : شوفي رجولها محروقه ووجهها ابيض
حصيصه : هههههههه ياخبل ذا يسمونه هيلا هووب وهي لابسه هيلا هوب اسود
سعيدان : وش يعني هيلا هووب
حصيصه : هذا الله يسلمك مثل سروال جدتي خط البلده بس لاصق فيه شراب


بعد ماخرجو من المطعم ..
سعيدان وعليان يراكضون ويطامرون : صايدينه صايدينه
حصيصه : وش ذا للي صايدينه صيادينه
داحم : الخرفان اللي هناك ..
ابو داحم : الله يغربلكم ذي ماهي بخرفان ذي كلابتهم
ام داحم : والله الفشله لو اننا بديرتنا كان احسن
ابو داحم : خل نروح نجلس عند بحيرتهم ابرك لنا وونكيف لنا بكم فنجال قهوه


عند البحيره :

فرشوا الفرشه وشبو الحطب وحطوا دلة الشاهي ودلة القهوه





ابو داحم قاعد يدندن :
ونيت ونتن مابعدها من ونتن
من ديرتن فيها خضرتن ....

ويقطع ابوو داحم دندنته الشعريه وفجاه يقوول اه ياام الداحم الا ليت الزمان يعود يوما والله كان اعرست من بناتهم ..
الا ذيك البنت اللي خذت عقل ابو داحم شقرا وعيون زرق وطول ورشاقه تتغنج من عنده ورايحه وجايه ومانشوف الا عيون ابو داحم رايحه جايه رايحه جايه وماترد عيونه مكانها الا دلة ام داحم على خشته ..

حصيصه ووضحى عند البحيره ..

حصيصه : يازينه زيناه
وضحى : ياليل مطووووولك من شايفه بعد هالمره
- شووفي ذاك اللي شفناه بالمطار
- أي والله
- والله اني حبيته ياوضحى
- ايه هين كل الناس تحبينهم انتي ياجعلتس بالعافيه


داحم وسعيدان وعليان
- شووفوا بطهم وش كبرررره
- ياحظهم
- كل شي عندهم كبير وغريب
- يازين من صاده وشواه
- الله لنا بس




حصيصه ووضحى ...

حصيصه : شوفي شوفي اللي شفناه بالمطار معه وحده وش زينها
وضحى : اف ياللي ماتستحي وانا اقول ليه سرت عانس تاركين بنات ديرتهم وجاييين هنا
حصيصه : ااه ياقلبي هذا وانا حبيته وحبيت زوله
وضحى : شوفي ذاك البزر يلعب معه
حصيصه : يه يه يه يقول له دادي ياجعلك بالماحي
وضحى : حبيب القلب طلع متزوج
حصيصه : لبى قليبه والله كيف بنسا هالمزيون الحين
وضحى : لا رجعنا الديره وجلستي بين خرفانك انا متاكده انك بتنسينه


ابو داحم : ياعيال تعالوووو يالله خل نرجع نناام
وضحى : ايه يبه الله يخليك مانمت من امس
ابو داحم : ساعدوا امكم وشيلوا العفش

في الفندق ..
رجعوا وكلن تعبان وفيه النوم حطو راسهم ونامو

عليان بدا يمشي وهو نايم وداس من فوق رجل حصيصه
حصيصه : يبه سعيدان داحم الحقو عليان يمشي وهو ناايم
ابو داحم : ياويلي ويلاه من وين راح
حصيصه : ؟؟ مدري عن وليدك بيفشلنا

عليان نط من الشباااااااك وابو داحم والعيال يصارخوون ..



عليان :

ياااااااااااااااااااااااااه الحقوووووووووني
بسم الله الرحمن الرحيم
الحمدالله اني عاايش
وش ذاااا الحلم اعوووووووذ بالله



عليان : يبه يبه
ابو داحم : ووجعه وش تبي
عليان : يبه تكفى مانبي نروح فرنسا
ابو داحم : فرنسا وش يوديني فرنسا انت صاحي !!
عليان : يبه وترا بنتك حصيصه عيونها طوويله .. وبنتك وضحى خبله تصدق حصيصه باي شي .. ويبه تكفى زوجني بنت عمي مابي اتزوج من بنات برا .. نبي نفك بناتنا من العنووسه
<<< حس بمعاناة خواته
ويبه طلبتك لاتفكر انك تهاجر وتترك ديرتنا والله مافي احسن من السعوديه
ابو داحم : اقووول قم صل ركعتين ونااااام لامردغك الحين
علياان : انشالله يبه ,, تصبح على

عذرا على الإطاله وتقبلوا تحيااتي
إنـــــــســـــــــان

يعطيك العافيه
بس جاني النوم وانا اقرأ

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههااا ااااااااااااااي

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههه
يعطيك العافية

صراحه قصه روعه بس طويله شوي