هلا بك يانظر عيني هلا قلبي ونبضاته× ولو ماشلك المجلس عيونك من يشيلونك
يابلسم جرح من يهوى دواء العاشق وعلاته× دخيلك ارحم اللي باالهوى والحب مظنونك
حروفك ساكنه قلبي قصيد العمر و أبياته× أحبك ضعف أضعاف إللي أهلك يحبونك
سنيني عمري الباقي ضيا عمري وشمعاته× يملهمها حياتي وش حياة اليافعي دونك
لجل عيونك السودا مراد يرخص حياته× تموتني وتحييني بنظرة شوق بعيونك
ياروح الروح ياحلم المولع بك ولهفاته× تغلا ياالغلا كل البشر لامايساونك
تدلل ياقمر عالي مضوي في سمواته× خذيت الزين يازين الحلا حاسب لمجنونك
جمالك حسن الفتان أبد ماشفت شرواته× من عيون الحسن يابو المحاسن ربي يصونك
عطاك الله حسنك كملك يازين بصفاته× خلق وخلاق طيبه ياكثرهم من يودونك
تولع قلب من حبك وزاد الشوق وناته× وأنا كلي على بعضي مولع بك ومفتونك..