كل البشر بالاتصالات يخطون = يخطون وأخطي عذرنا هاتف فلان
ومن عادتي مهتم باللي يقولون = من غلط في رقمي لقى الرد غلطان
اللين جاء في يوم دق التلفون = شفت الرقم لقيته اشكال والوان
فتحت جوالي ابعرف من يكون = سمعت صوت فيه بحه وفتان
قالت لي انت سعود قلت ايه بالعون = لعيونك اسمي سعود لوكان ضيدان
قالت تظني مخطئه قلت وشلون = قلبي توقف مانبض فيه شريان
بالهون يابنت الاجاويد بالهون = من عادت الانسان يرتاح لانسان
تسمعي يابنت وابليس ملعون = واخذي كلام مصدره صدق وجدان
ماني بقايل لك انا انسان مزيون = أطرق ولا له شبه بالانس والجان
أنا محمد وافي الهرج موزون = اوزن كلامي قبل اقوله بميزان
وانا الذي اذا حب لايمكن يخون = مخلص مدامه حي ويموت ماخان
وأنا اذا حبيت حبيت بجنون = حبي يفجر بداخلي الف بركان
وانا الذي مطرد ورا من يقفون = من صد عني عمد بجزيه حقران
هذه وصوفي وأكثر الناس يشرون = وانتي عليك اليوم تقدير الاثمان
قالت اشوفك قمت يامحمد تمون = تضحك وضحكتها تقاسيم فنان
قلت الميانه ماهي بضحكة سنون = أحيان ماتلقينها بين الاخوان
ترا الميانه شي واضح ومضمون = اذا اجتمع شخصين في قلب ولسان
قالت كلامك وافي يابن خلدون = احيان احس جلستك بين شيبان
يامحمد اسمع كلمة البنت ميسون = أسلوبك ووقتك مضت دونه أزمان
هذا زمن قدواته أفلام كرتون = وهذا زمان رجاله اجساد وابدان
قالت وغنت لي على وقتي لحون = قلت اسكتي من بعد ماخاطري شان
أنا ادري ان الوقت من دون في دون = لاكن فمان الله وانسي اللذي كان
قلته وانا صامل وهي عندها اذون = لاكنها ماصدقت سمع الاذان
ضاقت وخلق الله دايم يضيقون = وانا قفلت الخط ضايق وزعلان
ونسيت والاجواد في الوقت ينسون = ماسمي الانسان الابنسيان
المشكلة بنات حواء مايسلون = دقت علي وانا لها شبه شفقان
قبل اتكلم قالت اسمع ولا تهون =اسمي ماهو ميسون حان الصدق حان
الاسم عمشاء واخر الجد مصيون = مهرة ولا طوعت بالجام وعنان
قلت ارحبي مليون تضرب بمليون = اقولها مليون من قلب ولسان
قلت ارحبي بالعين ولحافك جفون = وظلالك من الشمس بهداب الاعيان
ياعين حر بالمطاليع مفتون = حر شراه مولع الصيد طربان