وبعد غيبه كنها عمرٍ أجتني تعتذر = يا حسافه وش كثر اعذار من خان العهود
ليتها تدري بحالي يوم قلبي منتظر=كنت اداري التياعي بالمنى بكره يعود
ذاب صبري يوم شوقي في ضلوعي ينصهر=أنذبح مليون مره ليتها تكفي الوعود
ليتها تقدر تداري دمع عيني المنهمر =وفي ثواني الليل كنه في حناياها يجود
ما وَصَلْها عن غرامي اللي عليها يستعر =يكتوي بالويل عمري والخواطر له وقود
حتى طرفي اللي هواها كيف يقوى يصطبر=العنا اضناه حتَّى ما عرف طعم الرقود
والا ايدي يوم كانت لين شوفه ما تقر =تكتب الاشواق فيها لاجل ترسلها وفود
الورق من كثر شوقه يوم ذكره ينعمر =أمسى في ذيك الليالي ينتظر منها ردود
القلم ضيَّع مراده يوم حبره ينحصر = في شفاته الف حسره تعتلي فيها قيود
البريد اللي يناظر منَّــها طيفٍ يمر =إنتظاره طال حتى ظنَّها ماله وجود
الحنين اللي بروحي في عذابه ينقبر= حتى نار الشوق فيني كنها صارت برود
يوم نبضي والا همسي كيف يقوى يستمر = والصدى بالحيل يملا كل انحاء الوجود
القصور اللي فبالي كان ظني تنعمر=ما عرفت ان الصواعق دمرتها والرعود
ماهقيت ان الاماني في مهدها تنتحر =وان حبري صار ذكرى وان ارواقي لحود
ما تمنِّيت المواجع تمتلكني وتنتشر =وتختفي حروف القصايد والخواطر والحشود
ويوم جتني قلت صبري يا فؤادي ينتصر= ما دريت ان الاماني شوك باطراف الورود
راح عمري وانت وينك كاد قلبي ينفطر =والا قلبك كيف ينسى صاحب القلب الودود
وكيف عينك وسط طرفك في منامه تستقر=والا اشواقك وروحك خبريني يالعنود
وش عساني الحين انطق لين دمعي ينحدر= الفرح اشرق بشوفك والمدامع له شهود
هو عسى المانع حبيبي خير قولي بانفجر=والا ما تدري بغيابك وان صبري له حدود
قالت اسمعني حبيبي الحين اقلك واختصر =مو بايدي انشغالي والا هجري والصدود
غصب عني ابعدوني وكيف قلبي ينجبر=غرَّهم زمن المصالح والمكاسب والنقود
والله باعوني وتكفي ..لا تخليني انقهر =والعهود اللي بقلبي في اساطير الخلود
قول بعتك والا حتى صيح وعاتب واحتقر = اشتكيني قول خنتك ما عليك اليوم زود
وشوف دمعي اشلون صاير من عيوني يندثر = ماهو دمعي اللي عرفته هذا دمِّي عالخدود
ما بغيت اجرح شعورك وانت يا روحي مصرّ=إنهدم قصر المحبة وما لقيت اللي يذود
يشهد الرحمن اني ما بغيتك تـنــكــسـر=والا تتعذب عشاني والا يذبل فيك عود
فيك تعذرني حبيبي قبل روحي تحتضر= والا ترميني بصحرا كلها جمر واسود
إجبر الخاطر بكلمه وليت جرحك ينجبر =وش يصبِّرني حبيبي وانت مالكني عقود
يا كثر احزان عمري في غيابك يا كثر = ويا كثر افراح اهلي والعواذل والحسود
ويا عنا المشوار فيني طال دربي او قصر =بأحمل الذكرى عساني يا منى قلبي اعود
قلت له بختي هويتك يا غناتي بانتظر =لو نذرت العمر كله وانكتب لي بالخلود
(في امان الله ) قلته يوم قلبي ينعصر =مستحيل الماضي يرجع ...والا يا عمري يعود