صدقيني العيد نفسه ما تغير من سنين*** فرحة اطفال وتلاقي.. لمّة احباب وقرايب

والاغاني والكروت وقولة (مْن العايدين) *** والتمام الشمل يوم العيد .. وانسام الهبايب

والتهاني والهدايا وحب روس الوالدين *** والمواصل للعمام .. وللخوال .. وللنسايب

كل حاجه مثل ماهي بس انا حالف يمين *** إن لا غبتي باسجّل نفسي في هالعيد غايب

وارجعي بالذاكره يابنت وانتي تعرفين *** ليه احس العيد عقبك جيّته جيّة مصايب

ليه لا طالعت (كرت العيد) اكفكف دمعتين ***من ذكرت اعيادنا وأيام كان الوضع طايب

اذكر اني من (مصلى العيد) وانتي تذكرين *** كنت اسابق خطوتيني متّجه يمّك وذايب

لجل اكون الشخص الاول لجل مني تسمعين *** في صباح العيد .. جملة (كل عام احنا حبايب)

لجل نكتب خلف (كرت العيد) ذيك الكلمتين *** كنت اجيك بقلب طفل وطيش شاب وثقل شايب

كنت انا اعايد وحالي حال باقي العاشقين *** وما معاي الا خفوقي وذي عيوني لك وهايب

وإنتي في اجمل ثيابك كاشخه والزين زين *** تثبتين إنك عجيبة غير عن كل العجايب

فرحة العيد .. بلقانا كانت اصلاً فرحتين *** مثل ضحكات الورود ومثل زخّات السحايب

ما ليوم العيد طعم وما لها الذكرى حنين *** وكل منّا في مكان وكل واحد له طلايب

الرجا في عيد الاضحى يمكن انك ترجعين *** ما اقول إلا عسى الله يجزي من كان السبايب

وإن رجعتي وشفتيَ إني في عداد الميّتين *** ذا انا باوصيك حاجة قبل تنحط النصايب

طالبك في كل عيدٍ .. بعد موتي .. تكتبين *** خلف (كرت العيد) جملة (كل عام احنا حبايب)







قصيده الشاعر محمد الشهري