صدروها وردوها ركبوا شيلو درايش = زخرفوها شرعوها سمروا الساس المهدم
أركوزوها أطرحوها قشة(ن) وسط القشايش = والقشايش شوف عيني الف وميتين متعلم
يامعلم كم وكم شفنا من علوم(ن) خشايش = ماهرجنا ولا كشفنا ستر ما كان متظلم
مابنت قصر(ن) يدين تعودت تبني عرايش = ولا رفعت ساس(ن) كفوف أتسلم اللي ما يسلم
ياطوير التوت ياللي في ذرى العميان عايش = أحذر صقور(ن) مخالبها لأشباهك تقلم
لايغرك طول ذيلك و الجناح اللي مترايش = صحصح لنفسك تراك طوير فالعالي تحلّم
والغزال اللي تعزز ثم عود للهوايش = ندخله ظمن الهوايش والحشيمه للمعلم
عسكريها لو تحزم بالمسدس وسط قايش = كنه إلا بنت وهبي يو للحفله تولم
قلتها يوم الحقوق بكف نتاش(ن) ونايش = كنها لقمه وطاحت بين جوعا ما ترحّم
من رعا حقي رعيته عن كثيرات اللبايش = ومن نكرني والله إني لأضربه ضرب(ن) موسم
رميتي وأعرف هدفها ما رمينا رمي طايش = دقت عيون الطرايد بالهجوس اللي تحكّم