رح ضيّع الوقت يا فاضي=أنصحك لا تلتفت ليّه

أنا بدوّج ترى راضي=ولا عاد تطري لي الجيّه

لا صرت لاهي ومتغاضي !=وشلون ؟! تدري بما فِيّه ؟

قضيةٍ ... مالها قاضي=بأدراج الأرشيف ... مرميّه

كريم ... يا بارقٍ ناضي ؟=يا للي غشى الأرض وسميّه

أنشدك ... والصدر مغتاضي=عن ساكن القلب وجْويّه

كلي ضما ... جفت حياضي=مدري متى ؟ !.. تقبل دليّه!

ارجي قبل ... تمْحل فياضي=هو .. ورد قلبي وجوريّه

أبو خديدٍ .. قمر ياضي=قربه عن الشمس ... لي فيّّّه

لاسوهج الفكر ... به جاضي=يغيب الإحساس ... موليّه

قلّه .. صبر صاحبه غاضي=الشوق له ... جمْرةٍ حيّه !

كريم ... وإن كان معتاضي!=الله ولا ... أحلام ورديّه

عزاي ... كانه نسى الماضي!=إن البقاء ... لصافي النيّه!